牢騷日記

煩煩煩煩煩煩煩煩煩煩煩煩煩煩煩死

2007-12-11T14:00:00.001+08:00

唉~ 又嚟. 我又開始鬧情緒. 最近周圍嘅嘢都好Q煩. 返工嘅工作好Q煩, Gloria個mutual fund做conversion, 我哋幾個staff齊齊變成clerk, 仲要係做好似我Form5做暑期工咁嘅temporary clerk, 人手去對D mutual fund account name同個customer name. 全國咁多間分行, 咁Q多個客人, print出嚟嘅report厚過至少5本電話簿. D字又細, 對到我頸都硬晒. 星期六已經幫佢哋對咗23%, 點知D branch staff又唔生性, 亂同D客開account, 宜家要我哋明天開始對埋嗰77%. 頂~ 對到出年都對唔完啦. 真係好鬼唔開心. 我唔開心唔係因為要我做D咁嘅嘢, 又唔駛用腦, 又有錢收, 有乜唔好? 我唔開心嘅係佢哋咁低能, 今時今日仲搵D咁原始嘅方法去對data. 上幾個星期有個來自上海嘅同事同我講話呢度好落後, 我一定會好frustrated, 佢真係冇講錯. 我今日聽到我個manager同我講我哋明日又要對data, 我真係個心沉一沉. 我諗起又要坐喺度對成日data, 肯定肩頸痛. 討厭.

心情差極了, 今日放工揸車都好似好好火咁. 我望望我掛在車內的十字架, 慚愧極了. 我都問自己乖乖地跟住前面架車, 唔好左穿右插好唔好? 真係不知所謂.

唉, 冇心機, 唔打喇, 係咁.

無言

2007-10-26T14:02:00.000+08:00

昨晚同D同事去食飯, 影咗幾張相, 我一睇, 真係覺得好離譜, 好恐怖, 好核突. 其實呢幾個形容詞都唔夠, 但係我中文又唔好, 英文又唔好, 我真係諗唔到D更加合適嘅形容詞.

我喺相中見到我塊死人面, 肥到好似當年劉德華同鄭秀文套戲瘦身男女劉德華同鄭秀文開初個肥佬肥婆造型咁. 大佬, 連我自己都過唔到自己嗰關, 有冇攪錯啊? 我點可以俾自己肥到咁架? 我真係好唔開心, 我嘅情緒真係好低落. 我D同事話我唔算食好多好多好多嘢嗰種, 其實有時食飽飯夜D我太太話肚餓我都未餓, 但係我就變到咁死肥, 我太太就食極都唔肥, 可唔可以公平D啊???????

大傷風

2007-10-11T18:37:00.000+08:00

計埋今日, 我已經傷風足足五日. 其實係傷風定感冒, 我都分不清. 從來都未試過傷風咁耐都未好番, 係咪宜家D菌特別勁呢?

星期日晚同太太食飯慶祝結婚三週年, 一路食一路流鼻水仲覺得好凍, 真係掃興.

星期一sick leave. 睇醫生食咗藥收咗鼻水, 但係食咗藥好眼瞓.

星期二返工. 朝早再去睇公司醫生, 未食晏11點我已經收工返屋企.

星期三返工. 今日個鼻好"盟", 把聲都同平時唔係好同, 食咗藥仲係好眼瞓. 我個manager見我坐喺度死頂叫我返屋企, 真係好人.

今日冇鼻水, 個鼻同把聲都仲係好"盟", 仲有D咳. 我今朝去稅局做tax clearance, 做完打電話俾我個manager, 佢聽到我咳叫我唔好返公司. 我最聽話, 當然冇返工.

我估我已經俾人炒咗.

咁叻, 你做吖

2007-10-02T15:09:00.000+08:00

今日個internet banking死咗成半日, login都唔得. 如果我仲做緊IT, 我個department實好緊張, D人實喺個office跑來跑去, 開幾個teleconference, 講嚟講去都唔知做乜, 永遠都唔可以快快搵出個root cause, 十次有九次都係咁, 我都見怪不怪. 你話佢哋係咪好廢? 我真係唔知. 佢哋係咪冇料? 又完全唔係. 我同嗰班人唔熟, 唔知佢哋有幾堅, 不過金管局俾壓力銀行, 銀行高層好自然就會壓落嚟, 可能佢哋班人受到大壓力, 緊張所以處理得混亂.

網上幾個forum都有人鬧呢單嘢, 甚麼屌佢老X, 頂佢個X, 要求葛X辭職, 要搵人祭旗乜都齊. 最叻就係話人D system屎, reliability低, 宜家D人就係咁, 講嘢唔駛負責任, 乜都講得出口, 要鬧人就有咁難聽得咁難聽, 總之你有甚麼影響到佢, 佢就係咪都鬧咗你先. 都唔期望D人會體諒, 但我真係好想同呢班鬧人system屎嘅高人講: 咁叻, 你做吖!? 煩!

天氣極差

2007-09-17T15:59:00.000+08:00

曾經有人同我講過, 加拿大冬天時常落雨, 到下午四點幾已經天黑, 好影響心情, 個人會好depressed.

呢幾日香港咁嘅空氣, 真係焗到我窒息. 從室內望出窗外只係見到一片灰色, 我都就嚟嚴重depressed喇.

早兩個月幾好天啊, 藍天白雲, 真係懷念.

排隊與教育

2007-09-17T09:21:00.000+08:00

今早返工經過商場門口, 見一班家長好開心咁叫自己班細路排好隊上校車返學. 行到落地鐵站, 真係強烈對比: 兩個啊姐喺度派免費報紙, 個情況有點似去水塘餵魚, 一放麵包落去, D魚就係咁搶食, 非常混亂. 我又走埋去攞份730. 當我行入地鐵站時, 有個爸爸一邊行一邊教訓佢啱啱攞咗份頭條, 似係讀緊小學嘅仔. 佢同個仔話, D人攞報紙好多都唔排隊架. 你要強硬D先得架嘛! 呢D就係叫攝位喇, 呢個世界, 出嚟社會就係咁架喇!

聽完個爸爸咁講真無奈. 其實佢冇講錯, 香港呢個社會確實係咁. 個個都唔守秩序, 你唔強硬D就搵唔到食. 但係如果個個人由細細個已經咁樣被教育, 就會形成一個惡性循環, 呢個城市將來唔會有人排隊架喇. 個城市愈來愈唔文明, 個個都爭先恐後咁去搶各自需要嘅嘢, 但係各人都唔會覺得咁樣有咩問題, 唔覺得有甚麼大不了.

實在太恐怖, 不敢想像.

我的小小意見

2007-09-11T10:54:00.000+08:00

近期我唔係好鍾意我所住屋苑嗰班乜乜業主大代表, 佢哋嘅行為我睇唔順眼.

之前佢哋幫屋苑唔知點慳到錢, 兩年都唔駛交一個月管理費, 可能佢哋都做到嘢嘅. 唔知咩關係, 佢哋同區內議員小姐好似唔係好啱. 我對呢D嘢一無所知, 亦都冇動力去跟進了解, 只係喺網上見到有一班所謂網友都唔多鍾意議員小姐. 議員小姐post乜佢哋都踩, 都單單打打. 我作為旁觀者, 覺得即使議員小姐有幾唔稱職, 又或者過晒界, 呢班網友都唔應該咁態度. 好似撩交咁, 我覺得佢哋都幾肉酸. 相反, 我覺得議員小姐就叻喇, 唔會同你班人嘈, 始於佢都有個議員身份, 佢嘅功績我唔知, 但係佢喺呢件事上嘅表現, 喺我心目中佢係比較優勝嘅.

講番班業主大代表, 佢哋嘅處事手法, 開始變得越來越肉酸. 可能佢哋見forum有班人捧佢場啦, 就沾沾自喜, 久不久就post一些屋苑事件出來. 但係好多時都講D唔講D, 扮晒有口難言咁. 我覺得佢根本就係喺forum探吓居民嘅反應, 啱喇就正式出通告俾全世界. 我開始覺得佢喺個非官方網站講呢D屋苑事務, 仲要講到唔湯唔水, 唔係好適當. 之後大代表仲變本加厲, 成日用屋苑名義攻擊乜乜政黨/議員小姐, 講到自己四面楚歌, 扮晒可憐, 但係有著大家支持, 我就會奮鬥到底, 為人民服務咁. 早排話有人破壞升降機門, 大代表喺forum話有人在電梯行凶. 當一班支持者都在網上話要緝拿凶手時, 佢哋居然派傳單, 用番相同字眼話有外敵在電梯行凶, 製造混亂, 破壞屋苑安寧等等. 邊有人D通告咁唔pro架? 好似小學生, 好似我寫blog咁, 真係走火入魔喇.

有人爆料, 原來大代表可能會參加選舉, 唔怪得佢係咁咬住人唔放啦. 原來天下烏鴉一樣黑, 大家都係為自己利益做嘢啫. 真係醜死鬼, 好在我都有自己嘅judgement, 當日冇盲目跟住人拍手掌. 個個都咁肉酸, 真係點叫人去支持啊?

Podcast

2007-09-07T09:31:00.000+08:00

前兩日被邀請去做podcast, 只係短短10分鐘嘅錄音, 但係我覺得好攞命. 一嚟要我正正經經講嘢, 二嚟要講我自己嘅感受, 亦係我嘅弱項. 三嚟時間只得10分鐘, 根本都講唔到乜嘢. 唔駛講呢個節目我實做得唔好, 都唔知自己講乜, 語無倫次, 不過真係一個幾有趣嘅經驗.

錄音後, 控制員哥哥播番個錄音俾我哋聽. 我真係聽到打冷震. 唔知點解, 我真係好鬼怕喺擴音機, 耳筒等物件聽到自己把聲, 我覺得好核突, 呢個亦係我已經6/7年冇去過karaoke嘅原因.

We've got the best midfield in the world

2007-09-07T08:55:00.000+08:00

oooooooooooooooo~
We've got the best midfield in the world
We've got Xabi Alonso, Momo Sissoko, Gerrard and Mascheranoooooooooooooo~

cheap咖啡

2007-08-20T10:45:00.000+08:00

昨晚睇完波夜瞓, 今朝我返到公司都仲係好眼瞓, 學人飲咖啡提神. 我唔飲公司D熱咖啡, 如果要走去st*rbucks又太遠, 所以就去汽水機買罐cheap cheap雀姣咖啡算數. 以前我嘅manager啊炳, 最鍾意每朝飲杯自己沖嘅雀姣咖啡. 佢飲完雀姣咖啡我實知, 因為佢一走埋嚟同我講嘢, 佢個口嗰D酸宿味, 真係好鬼死臭. 我必定要忍氣用口呼吸, 真係臭到我頭都暈. 我飲完罐雀姣咖啡, 都聞到自己D死人酸宿臭咖啡味. 即刻去洗手間漱口, 飲大杯水, 食香口膠乜都齊. 原來飲貴D嘅咖啡同飲D cheap貨真係有咁大分別, 我咁cheap又唔捨得買st*rbucks咖啡, 以後返工眼瞓都係去洗手間洗個面, 或者索性請sick leave算喇, 哈哈哈!

報紙

2007-08-15T15:28:00.000+08:00

每日返工坐地鐵時, 如果我已經瞓醒, 就會攞份都市日報睇吓. 其實我覺得都市日報好悶, 所以如果我有時間, 我會入閘前行遠些少, 去攞份am730睇而唔攞都市日報. 唔鍾意睇頭條日報, 覺得佢好亂, 似份八卦小報多一點.

每朝都見到D啊毛, 一個人幾份免費報紙全部攞齊, 有時仲冇蝕底到一份報紙要攞幾份, 見到佢哋班死人貪心樣好討厭, 派730個啊姐唔派多份俾呢班貪心啊毛, 佢哋就鬧人, 醜陋到爆. 啊毛唔坐地鐵, 就企喺閘口, 叫其他人幫佢攞閘內嘅都市日報, 我每次都唔理佢哋. 我見到佢哋D衰樣真係好想借個火機一把火燒晒D報紙都唔俾佢哋攞. 佢哋可能話自己窮所以要攞免費報紙, 但係都唔需要咁貪心.

屋企如果有睇完嘅報紙, 我會連同其他廢紙放在大廈嘅廢紙回收箱. 唔知點解, 我放在回收箱內的廢紙, 有時可以幾日都冇人回收, 但係D報紙就好快可以唔見晒. 兩星期前, 回家經過回收箱時, 隔著防煙門見到有個賓賓喺度執回收箱內的報紙, 我靜靜地觀望, 見到佢攞住好大袋報紙, 再將回收箱內的報紙放入她的大袋內. 她從後樓梯離開時回頭望一望, 看見我便大驚, 馬上逃往後樓梯. 我估呢位賓賓有呢個洗樓嘅習慣, 可能收集我哋大廈每層回收箱嘅舊報紙, 每個星期放假時攞去賣. 唔怪得成日回收箱內嘅報紙就咁快唔見晒, 垃圾桶滿晒又冇人倒啦.

同樣都係攞報紙, 可能我大細超啦. 如果賓賓開聲問我, 我可以每日將報紙留起給她都冇所謂. 佢自己執回收箱內的報紙, 唔會影響人. 你話佢攞去賣錢, 至少佢親力親為去洗樓執人哋唔要嘅嘢. 好過D啊毛貪心同一份報紙要攞幾份, 仲要惡人先告狀咁衰. 不過如果賓賓嘅僱主知道佢執D舊報紙儲喺自己間屋裡面, 會唔會炳佢呢?

野戰

2007-08-10T21:36:00.000+08:00

今晚睇新聞見到呢個報導, 好想搵條片睇睇, 好犀利. 勁過睇Discovery Channel, 緊張過睇National Geographic.

我又去書展

2007-07-26T21:30:00.000+08:00

剛過去的週末是太太的生日, 同佢食完飯慶祝後去鄰近嘅書展. 我無文化, 除非係一些我真係有興趣嘅題目, 如果唔係我係任何書都唔睇嘅. 我哋已經差不多晚上十點幾先到, 但係都好多人. 跟住指示, 我哋先到達賣兒童書嘅地方, 一見到咁多人, 我已經想走. 走嘅意思係完全離開會展. 但係當天係太太生日, 我點可能逆佢意?

早前睇新聞介紹一本叫《Economic Naturalist》嘅書, 用經濟學去解釋一些生活上嘅大小事情. 我係讀economics嘅, 上網睇咗呢本書第一個chapter, 幾有趣喎! 咁去書展就扮有文化去買啦. 行咗成晚都搵唔到, 加上咁鬼多人, 我都唔係好想逼入去D攤檔搵, 遲D去PageOne買好過.

最後去到賣基督教書籍嘅攤檔, 見到早前報紙介紹過, 我哋公司主席寫嘅《天國與財利──葛霖論金融市場》. 一嚟葛霖原來係個基督徒, 二嚟佢係公司主席, 所以我又有興趣睇佢本書. 不過, 我唔想睇中文翻譯本. 葛霖本身講英文, 睇慣佢出circular係英文, 本書睇返原裝英文版我會舒服D. 但係問個職員, 佢話冇英文版賣.

終於我就乜都冇買, 空手而回喇.

九龍皇帝駕崩

2007-07-26T16:25:00.000+08:00

真係好鍾意今日各報章差不多一樣嘅標題.

以前細個見到啊皇帝D黑色大字好鬼驚, 覺得好恐怖. 大個咗梗係唔驚啦, 唔會反感, 但係就唔會扮晒嘢話欣賞佢D藝術云云. (係鬼藝術!) 後來睇過關於佢嘅報導同電視特輯, 覺得佢個人幾好笑. 昨晚Cable播返幾年前佢嘅作品賣咗幾萬銀嘅新聞, 當時問佢開唔開心, 佢嘅答案真係過癮, 我都對住個電視笑咗幾聲. 如果有得睇返嗰D特輯就好喇.

Plane spotting 07-07-07

2007-07-07T22:23:00.000+08:00

身痕了數星期, 剛於星期五中午賣了支Tamron俾人, 即晚放工與啊sir一齊去買了支新鏡頭, 終於止痕了. 其實我留意到天氣報告預測今日天晴, 又難得近來個天比較清, 所以想早些買支新鏡頭, 又走去影飛機.

啊sir今日唔得閒, 我唯有做獨行俠. 我出門前忘記留意機場風向, 在地鐵上才想起呢個問題. 最終都係決定去跑道尾影. 在跑道尾遇到forum中的高手, 佢哋D鏡頭又粗又大碌. 佢哋又帶晒摺椅同食物飲品, 好似嚟野餐咁. 機場吹西南風, 用25L跑道起飛, 有點失望, 我應該出門前check清楚, 去客運大樓那邊影飛機降落.

以前我哋幾個人, 一人一部所謂半專業機仔, 唔湯唔水, D飛機影出嚟好散好鬆, 今日影出嚟嗰D就比較滿意喇. 不過我技術所限, 尚要多些練習才可影得好D. Send咗幾張相俾啊sir睇, 今次到佢身痕, 好後悔又好可惜冇同我一齊去影飛機. 等我哋用熟D支新鏡頭, 兩星期後如果好天一齊再去影過啦.

失望

2007-07-06T23:45:00.000+08:00

香港人真係冇得救架喇. 因為個環保袋, D閒人居然可以走去圍住Landmark排幾個鐘, 做多D有建設性嘅嘢仲好啦. 新聞訪問個女人, 佢話見個袋有人炒到幾千銀, 所以佢又走去排隊買. 如果係為咗呢幾千銀, 呢D咁嘅死蠢就真係戇居喇. 今時今日, 舒舒服服咁打個電話俾經紀, 又或者自己上網買D大路中字頭股票, 都搵到食啦. 唔需要咁辛苦同人逼喎.

我最唔鍾意人用埋D冒牌貨, 但係今次真係好希望見到街市D啊嬸同菲傭攞住幾廿個A貨出街.

Happy days

2007-07-05T00:00:00.000+08:00

He's ours!!

Dunk, you really know best!! YNWA!

投訴

2007-07-03T23:12:00.000+08:00

在某forum見到呢個題目, 笑死我.

剛才電視新聞講到因為天氣關係, 解放軍跳傘隊要取消部分表現項目.

記者訪問一位阿嬸, 問佢對呢個安排滿意唔滿意.
阿嬸"梗係唔滿意喇, 我要投訴!"
之後鏡頭一轉就去左第二度, 無再交待阿嬸既感受
咁到底阿嬸想投訴邊個呢?!

1. 投訴主辦單位, 派飛時無講明跳傘隊是否全力以赴置生死於道外
2. 投訴解放軍跳傘隊無鬼用, 落兩滴雨就腳仔軟
3. 投訴上帝係七一回歸時落雨, 懷疑上帝唔夠愛國, 係漢奸洋奴

都唔知從何時開始, 我哋呢班麻煩香港人興起乜鬼嘢都要投訴, 去馬場攞唔到爛鬼馬仔模型要投訴, 電梯唔開要投訴, 屙屎唔出又走去投訴, 煩死.

其實市民有呢個為自己嘅權利發表自己嘅感受, 自己嘅意見嘅出發點係好事. 但係如果係又投訴, 唔係又投訴, 仲要個死人態度好似全世界都欠咗你嘅, 你自己大晒, 個地球都好似只係因為你而轉嘅, 咁唔該你死咗佢啦. 真係好鬼憎呢班得把口叻唔切, 叫佢行出嚟做D嘢又唔見影嘅廢柴.

鬧情緒

2007-06-26T23:36:00.000+08:00

近日心情不大好, 給公司裡的閒事煩死了. 加上公司裡的三姑六婆一人一句, 真係好想喺佢哋面前爆粗, 叫佢哋收嗲唔好L煩. 幸好秘書小姐Cynthia同闊太Maggie都好幫得手, 替我完成了很多吃力不討好嘅無謂事務, 不然我一定爆炸. 今日整個下午我都冇出過聲, 原來唔出聲, 唔回應係一個對付嗰班煩人嘅一個唔錯嘅方法.

最近與太太講好我們的新project. 問咗一兩個agent, 個價錢都叫做差不多, 當然如果可以再高D到我個心水價就perfect. 心裡面15/16, 我真係好緊張我哋呢個project, 只可成功不許失敗, 可能因為太擔心嘅關係, 攪到我男人老狗學人鬧情緒.

姣得好鬼死正

2007-06-11T20:21:00.000+08:00

冧死我! 試問香港有邊個藝人明星仔可以做到咁姣都唔會令人反感?

戒薯條

2007-06-11T16:54:00.000+08:00

好嘢, 宜家食麥當當可以改要粟米唔駛一定要食薯條. 粟米, 我鍾意食. 為咗表示我減肥嘅「野心」, 我決定唔食麥當當薯條. 以後邊個見到我偷食薯條, 我俾一舊水佢做揞口費.

遊記 (終於都交到貨)

2007-06-07T14:45:00.000+08:00

2007年5月13日, 星期日. 天陰有雨.

今日係今季英超最後一日賽事, 但係今日係我咁大個仔第一次去現場睇英超. 一早起身, 喺酒店食早餐, 已經在餐廳見到幾個著住利物浦波衫嘅客人, 心裡已經好興奮. 在餐廳內, 有三個著住利物浦死敵曼聯波衫嘅傻佬, 佢哋一定係食完早餐坐車去Manchester, 睇Scum v West Ham.

食完早餐, 我哋行去酒店附近嘅Williamson Square. 其實我已經做足功課, 知道喺Williamson Square有間Liverpool FC Club Store. Club Store內已經人頭湧湧, 如果呢道係銅鑼灣Sogo, 我一定會拉我老婆走. 但係入到去, 即使係見到印有Liverpool badge嘅BB衫, 我都覺得十分吸引, 如果我有小朋友, 我一定每款買一件俾佢.

買完嘢, 諗住坐的士去球場, 點知見到對面馬路有架巴士, 巴士上有好多人著住紅色衫, 我估呢架巴士定會途經Anfield, 我哋兩公婆即刻跑過馬路去巴士站, 哈! 果然呢部17號巴士會途經Anfield, 慳返D唔駛搭的士咁重皮.

巴士到達Anfield門口一落車, 真係好似發夢一樣, 眼前所見嘅影像, 已經在相中或上網見過晒, 但係當我親眼見到, 個感覺真係好特別, 真係估唔到, 我真真確確, 實實在在的已經來到了.

距離開波時間仲有2個半鐘, 我們沿球場外圍行, 影吓相. 行到中間, 見到players' entrance. 兩旁有大班球迷聚集, 我諗D球員應該未到, 我哋兩個又走入人群中, 找到個唔錯嘅位置, 好似D無知少女喺廣播道等明星咁等我心目中嘅超級偶像到場. 企喺度等咗一粒鐘, 我老婆都已經話企到好疲倦, 佢又俾D鬼佬遮住視線, 我心裡真的很抱歉, 要我老婆陪我癲, 但係我一定要等! 過多一陣, Charlton架車先到場. 1時30分, Liverpool嘅team coach終於到場, 雖然每個球員從落車到入球員通道嘅時間, 都唔夠一秒, 但我已經好滿足喇!

再沿球場外圍行, 去到Shankly Gates, 見到有架靚車泊緊位, 好多人都走緊過去, 我當然要過去睇下係邊個大人物. 原來係2005年Liverpool贏Champions League嘅功臣Jerzy Dudek, 可惜佢今日有傷在身, 唔能夠上陣. 如果唔係, 今日佢應該有得正選出場.

已經1:45pm, 老婆話肚餓. 跟著我真陰公, 我自己心情興奮到極點都唔識肚餓. 如果日日都咁高興, 我應該可以好快就減到肥. 買咗隻hot dog俾老婆. 天開始落雨, 我哋2pm要去搵個朋友嘅brother-in-law, Peter, 一齊入場, 全靠佢幫我哋搵人買tickets, 如果唔係買2張黃牛飛要180英鎊, 肉赤死都似.

Peter喺Liverpool土生土長, 但係佢唔知點解, 居然係一個MU supporter. 呢個世界真係資源錯配得好嚴重, 佢住Liverpool居然支持MU, 我住HK就支持Liverpool. 為咗我哋, 佢今日要陪我哋入場睇佢最憎嘅Liverpool, 冇得睇MU攞冠軍, 抵死! Peter搵個叫啊Sean嘅鬼佬攞飛, Sean喺official supporters club有要職, 所以攞到唔錯嘅位, 我哋同Peter同啊Sean加埋啊Sean個仔坐第3行近球場正中間後備席, 可以好接近球員, 我真係仲開心過中六合彩.

入到場坐低, 企正喺我哋前面有個黑人同人簽名, 睇清楚D, 原來係Sissoko. Sissoko嘅passing真係水皮得好緊要, 再加上我嘅新愛將Mascherano咁勁, Sissoko今日冇得出場, 所以佢可以咁得閒同人簽名.

球員未出場時, 球迷一同高唱會歌You'll Never Walk Alone. 原來四萬幾人一齊唱嘅時候個氣氛係咁厲害. 呢D就係所謂嘅"passion"喇. 連Peter都承認, 喺Anfield睇波個氣氛係好過喺Old Trafford睇MU. 我2003年都喺香港大球賽睇過Liverpool對香港隊, 雖然當時場內九成九嘅球迷都係支持Liverpool(尤其係Owen), 但係個氣氛同呢一刻真係差九萬九千九百九十九條街.

下午三時多, 比賽開始, 今日係Robbie Fowler最後一次喺Anfield代表Liverpool出賽, 所以今場波由佢嚟做隊長. 我真係好鍾意Robbie, 佢全盛時期的時候, 真係勁到爆, 我都有好大原因係睇佢而選擇今日嚟.

場波唔好講, 我真係黑仔, 咁遠飛到英國又坐三個鐘火車嚟佢居然開波一分鐘就先輸一球. 可能班球員驚傷, 又想留力待十日後喺Champions League final對AC Milan. 最後對住呢隊已降班嘅Charlton只係最尾追和2比2.

完場時, Peter叫我倆快D走去場邊睇end of season嘅lap of honour. 球員都會一家大細抱埋自己D仔女出嚟繞場一周同向球迷致謝. 可惜天仍然下著大雨, Gerrard沒有抱佢2個女出嚟. 佢個大女都幾可愛架.

離開球場, 又多人又落大雨都唔知喺邊度搵車返酒店. 跟住人群向city centre方向行, 行了半小時有多, 才在一條大街上見到的士, 同其他人搶了十多部的士我們才截到一部, 返酒店去了.

世界難撈

2007-06-06T16:30:00.000+08:00

人人都話要走, 連忠心好馬堅哥都話要resign. 佢真係堅, 未搵到後路都遞信, 以為佢真係有咁大決心. 點知條友仔, 俾黃蓉講掂咗叫佢留低, 喺我面前又話自己有幾大決心要走, 死性不改, 吹水大王.

如果堅哥都走埋, 我哋以前條team內嘅自己友真係冇晒喇. 我走完到史密夫同史密太. Missy又過咗嚟, 啊Cham又要跟老公去Singapore, 只剩下啊sir與堅哥.

Clau姐將會返去做, 史密夫都問緊話想返, 連以往做到黑口黑面嘅葉雅媛都話想返去, 唔通出面嘅世界真係咁難撈, 個個都要返去庇護工場?

尋找完美的forums

2007-06-06T13:38:00.000+08:00

我返工時好懶, 成日掛住上唔同嘅forum. 我留意到要辦一個成功嘅forum好困難, forum成立後要維持得好更加難. 以前上一些香港本地forum, 開初都覺得幾有趣, 但係這些公眾討論區乜人都有, 好快已經覺得內容不知所謂, 根本D人就係喺個討論區內發洩同表達自己嘅無聊同弱智, 浪費時間.

後來同事介紹icered, 原來有咁多同事都鍾意上該討論區鬧一些中層managers, 有趣得很, 後來喺我原全唔清楚嘅情況下, 個討論區消失了.

學人買樓, 尋找到屋苑嘅討論區, 大部份人都係業主, 有共同話題, 又對自己屋苑嘅事情關心, 當時我每日返工嘅工作就係上呢個forum, 我覺實在該討論區得益不少. 不過可能大家已經住了好幾年, 大家都熟悉了自己間屋, 自己個屋苑, 所以現在再沒有那麼關於居住嘅問題, 整個討論區變了質, 又變了乜都有, 我都開始變心了.

因為興趣, 都有上某個飛機討論區, 可能因為大家有共同興趣, 呢個討論區都令人覺得幾開心. 可能呢個討論區推廣不足, 人流不算多, 人少反而可以令各會員在網上和活動中融洽相處, 希望可以延續.

自從去過利物浦後, 我更加緊張Liverpool FC呢一間球會嘅每件事物. 我亦愛上了去Dunk所辦嘅forum. 每日我幾忙都要check幾次, 留意最新消息. Dunk可能7月會隨球隊來香港, 希望到時可以再同佢見吓面, 個傻佬唔識睇中文, 唔知到時佢會唔會帶埋Big ears, Katie同Emma嚟呢? 哈哈!

心情麻麻

2007-06-05T22:39:00.000+08:00

又出咗一件貨. 繼部O2 Graphite電話同部Canon S30陳年舊數碼相機後, 今日賣了部Canon S2數碼相機.

唔知點解, 今次賣完部相機唔係好開心. 我滿意個成交價, 但係當個買家在驗貨時, 我企喺度望住佢同部相機, 個感覺好奇怪, 真係奇怪到唔識形容.

我明明已經唔鍾意部相機, 但我好似有少少唔捨得佢. 矛盾, 但我就係咁鬼煩.

樓上來的聲音

2007-05-09T15:36:00.000+08:00

昨晚瞓到半夜, 又被樓上一對男女嗌交的聲音嘈醒. 其實好恐怖, 男人把聲想殺人咁款, 女人聲嘶力竭地回應. 半夜屋苑額外清靜, 加上環境因素, 他們每一句的嗌交聲都形成了回音在屋苑迴盪, 都幾震撼.

除非他們是親戚, 不然一對男女選擇同住在一間屋, 兩人當初關係必定非常密切. 不知從那時開始, 雙方關係開始走下坡. 彼此覺得討厭, 連與對方相處多一秒都不願.

聽到女人哭著說男人又打她. 我時常說見到一些衰人想揪佢, 但你叫我真係要出手打一個人, 我暫時真係做唔到. 男人仲要打一個應該比他弱小的女人, 我個人覺得他倆已經到了一個非常嚴峻嘅地步.

唔想咁黑心, 當然希望他們可以和好如初, 但係為咗避免有任何意外或凶案發生, 佢哋都係快些分手/分居啦.

未出發先興奮

2007-05-08T11:08:00.000+08:00

今日收到一個超級好嘅消息 -- Kevin終於幫我買到門票, 我今個星期日可以到Anfield, 現場睇Liverpool對剛剛要降班嘅Charlton. 我跟咗Liverpool足足廿年, 終於可以去Anfield喇.

嘩, 緊張咗幾個星期, 幾驚要買黃牛飛啊. 雖然呢場係一場例行公事嘅聯賽, 但係因為佢係今季最後一場主場比賽, 再加上Liverpool打入了Champions League final, 所以好多人想入場睇. 每季最後一場主場比賽後, 全體職球員都會繞場一周與球迷道別. 今次係Jerzy Dudek喺Liverpool嘅最後一場比賽, 也極大可能係我最鍾意嘅Fowler最後一次代表Liverpool出賽, 所以我一定要老遠飛去睇佢啦.

好好好好開心啊!!!!!

有欲有求

2007-04-27T14:48:00.000+08:00

今日出咗旺角食lunch, 順便去萬成睇嘢. 哈, 俾我見到個和尚喺度買手機. 和尚想買A牌子手機, 但係俾B牌子手機嘅贈品所吸引.

因為個贈品, 和尚唔知買邊部好. 佢同個售貨員講, 佢買A牌子手機, 但係要售貨員送B牌子手機嘅贈品俾佢. 售貨員服務態度冇得頂, 唔駛俾面: 「唔得架! 你買電話唔係為咗個贈品而買架嘛!? 你唔係睇你需要乜嘢功能而買電話嘅咩?」

仲以為和尚真係食齋, 無欲無求嘅添.

熊貓嚟喇

2007-04-26T20:49:00.000+08:00

兩隻年輕嘅熊貓嚟咗香港喇. 原來年輕活潑嘅熊貓係咁得意嘅, 尤其係早前啊許仕仁去玩嗰D小熊貓.

其實我覺得呢兩隻嚟香港嘅熊貓好慘, 生得靚仔靚女D就俾人挑選要嚟香港, 離鄉別井, 空氣又唔好. 以前住嘅地方唔係人人都去得, 環境幽靜, 生活寫意. 將來, 呢對金童玉女就要日日對住我哋呢班香港人, 嘈喧巴閉, 麻麻煩煩. 漸漸地, 佢哋就會好似宜家嘅安安同佳佳咁, 唔識郁, 只係識日日坐喺度咬住碌竹, 食到成身都係, 好似住喺不負責任老人院嘅可憐啊公啊婆咁. 唉, 好地地兩隻熊貓咁就一世.

今日睇完新聞, 真係更加替兩隻熊貓難過. 都唔知邊個咁大整蠱, 幫佢兩個改個咁娘咁核突嘅名. 點解D人咁死老土, 同D動物改名, 係都要用疊字嘅呢? 不如叫「求求」, 「其其」啦. 幾千個人參加改名比賽, 都只係改到D咁嘅名, 我反而想知道其他落選嘅名係乜. 我寧願叫番佢哋「606」同「610」仲好聽喇.

中招

2007-04-24T15:13:00.000+08:00

同事豬豬上星期五朝早開始成日咳. 我哋叫佢帶口罩, 佢唔肯. 我話我唔想俾佢傳染然後成個weekend喺屋企病, 個死嘢反而叫我自己帶口罩, 佢嫌帶口罩焗, 會唔舒服. 整佢個掣.

星期五下午, 平日口水多過浪嘅豬豬靜過乜, 粒聲唔出, 只係同Helen講過話好凍, 到5:30pm佢就即刻準時走咗喇.

星期五晚, 我突然開始覺得凍又流鼻水, 真係俾我講中, 十成十係俾豬小姐傳染啦.

星期六朝, 我個喉嚨唔舒服到我好燥. 喉嚨痛係我嘅死穴, 邊個想死就等我喉嚨痛時嚟煩我啦.

星期日, 鼻水已收得七七八八, 因為已經變成鼻涕. 鼻塞同埋咳, 咳到我個喉嚨好似想爆咁.

星期一, 仲係好唔舒服, 打電話返公司請病假, Ceci話連埋我同豬豬, 今日有四個人請sick leave. 今日嘅所有financial loss, 應該從豬豬嘅薪金中扣除.

今日星期二, 我返到公司, 隻死豬都仲未病完, 仲未返得工. 昨天都有攞sick leave嘅Kitty在十時多回家. 我在office咳了大半個朝早, 到大約十一時徇眾要求離開公司, 返屋企慢慢咳.

新office

2007-04-11T16:25:00.000+08:00

因為地小人多的關係, 復活節假期回來後, 我們的office換了一個新setting. 以前一人一張枱兩個櫃, 現在六個人一張大枱(枱上有partition), 一人一個細櫃再加兩個中櫃六個人分. 我討厭呢個setting,實在討厭到不得了. 現在冇晒privacy, 而其他同事在傾計或討論時, office就會很嘈. 我呢兩日比起平時更加有準時放工嘅衝動.

因為大家嘅工作環境變差了, 所以公司就用了些少地方闢作休閒空間. 休閒空間放了一張osim按摩椅供同事們享用. 都唔知邊個聰明人提議放張按摩椅喺度. 我咁耐只係見過一位同事試用張按摩椅. 佢一用, 成班師奶就圍住佢, 叫佢點瞓, 叫佢試呢個program, 試嗰個program. 人哋用按摩椅suppose係應該好relax嘛, 唔係俾D師奶當人白老鼠咁圍住睇. 另外, 查實有邊個同事會咁夠薑, 返工時間無端端走去按摩一番吖? 好得閒啊? 你做晒你D嘢嗱? 定係你冇嘢做啊? 得閒冇嘢做嘅, 都集中精神對住部電腦, 扮做緊嘢啦. 搏炒咩? 戇居.

錯誤的決定 2 之告一段落

2007-04-03T14:54:00.000+08:00

3月25日, 用咗部Nokia E65已經兩日, 非常滿意. 另方面, 一見到書桌上的O2 Graphite, 就非常心傷. 冇錯, 我可以當佢係一部後備電話, 但係...唉, 我用咗咁多年手提電話, 都從來冇需要有甚麼後備電話, 做乜咁多餘吖. 早早賣咗佢cut loss, 攞得番幾多得幾多仲好啦.

上香港嘅Yahoo!拍賣網, 見有人賣佢部Graphite, 有人出價$2,600同佢要, 但係賣家有保留價唔肯賣, 仲寸人知唔知個市價. $2,600? 發神經. 如果有人出$2,600, 我即刻送上門! 街邊回收出$1,700咋! 都唔知邊個唔知價. 如果要跟市價, 我不如去豐澤百老匯買啦, 駛鬼同你買二手咩. 本來我都想在Yahoo!拍賣網沽咗佢, 但係原來呢個拍賣網要俾佣金. 咁鬼煩, 我都係返去go2hk.com賣. 我曾經在go2hk.com賣過林憶蓮演唱會門票, 譚詠麟演唱會門票和我部陳年IXUS相機, 從來都唔駛佣金, 今次賣Graphite, 都要靠佢喇.

我開價$2,200, 冇保留價, 要錢唔要貨. 一星期後, 拍賣結束. 只得3個bid. 我都唔知係咪go2hk.com人流唔夠定係呢部機真係唔掂, 成交價$2,300. 比起街邊$1,700, 我多收$600, 只係蝕$1,380, 我都滿足喇.

今日中午與買家在地鐵站交收, 原來佢係買部機俾佢個仔用. 佢check都唔check吓部機, 就俾錢收貨, 夠爽快. 我$2,300袋袋平安, 安樂晒!

廁所裡認識的朋友

2007-03-28T17:26:00.000+08:00

攪清楚, 我絕對唔係基佬, 我唔係嗰D喺廁所搵獵物嘅渣滓. 只不過我係懶人一個, 懶人多屎尿, 返工時常去廁所, 在廁所裡又時常碰見男廁的清潔工人, 見得多咪同佢打個招呼囉.

其實佢都幾寂寞, 返工時我有同事與我交談, 得閒又可以上網. 佢日日只係對住一個個嘅屎坑和一卷卷嘅廁紙, 冇人同佢講吓嘢佢唔悶死都口臭死.

可能因為同佢沒有利害關係, 同佢打招呼, 總覺得佢嘅態度誠懇, 比某些表面上同人嘻嘻哈哈, 其實戴住個死人假面具嘅老屎忽, 與他碰面後身心都總會覺得舒暢.

錯誤的決定

2007-03-23T10:54:00.000+08:00

我的手提電話對我很重要. 並不是我要用手提電話傾生意, 我冇咁本事. 只是因為我在公共交通工具的時間多, 所以我時常用3G收看新聞. 用了Smartone嘅3G已經一年半, 當初用Smartone時用了$1,980買一部Sharp SX813. 其實Sharp的手提電話真的非常出色, 我之前用嘅Sharp GX32都係接收能力強, 通話清晰, 個screen又靚. 用了Smartone嘅3G一年半後, 合約到期, 同事朗奴話Smartone嘅3G內容冇乜料到, 提議我轉去用"3". 再加上我覺得SX813的機身太厚, 想轉台時又想換部新的手提電話.

我對手提電話的要求不算很高, 我只需要一部可以上3G的電話, 我不需要用手提電話影相, 也不需要用手提電話聽歌. 在2月頭, 睇過好多手提電話, 沒有一部我喜歡, 我不太喜歡Sony Ericsson, Nokia又沒有吸引我的手提電話, 突然被我發現O2出了一部名叫Graphite的smartphone. 這部Graphite樣貌平凡到不得了, 但卻滿足到我用手提電話的要求, 再加上我從未用過Windows mobile嘅手提電話, 所以上網睇咗幾個review後, 便第一時間用了$3,680買了O2 Graphite.

初期用部Graphite都ok, 不過覺得佢嘅response比較慢, 有時當有來電時, 部電話居然只識震, load唔到鈴聲. 又有時當我用緊3G睇新聞有來電時, 居然入唔到線兼個3G窒窒下, 愈來愈唔掂. 3月中, 轉到"3", 替部Graphite設定3G settings後, 發現部電話居然唔support video streaming. 大件事! 我轉去"3"就係喜歡佢有90小時即時新聞直播, 宜家睇唔到, 我咪傻仔? 我check過其他品牌的手提電話, 大部份都用到"3"的3G. 唯獨是我手上的SX813及Graphite用唔到, 我都唔知點解我可以樣衰得咁緊要.

上個weekend, 攞了部SX813俾CWB嘅街邊收買佬, 條友話我部機花, 又乜又七, 只係出$1,200, 我同佢講話豐澤trade-in都收$1,200啦, 佢都係只肯加多$30仲要俾佢話我喺豐澤買機貴. 早唞! 前幾日, 再攞部SX813俾中環出晒名嘅「高價」手提電話收買佬, 佢睇都唔睇又唔駛試部機, 即出價$1,250, 我也即刻要錢唔要貨. 呢D咪叫好service囉, 我賣得happy時條氣又順吖嘛.

我真係冇咗3G唔掂, 我唯有在2個月內購買第二部新手提電話. Nokia在3月初推出了E65, 幾靚仔喎, 為何佢哋唔早D喺2月初我買Graphite時推出呢? 最衰就係呢個幾兩個星期全城缺貨, 有錢都買唔到. 同Madam Leung到豐澤搵我哋御用高級售貨員亨利, 叫佢幫我E65有貨就留一部. 亨利好好人, 豐澤本身標價$3,788, 佢$3,680賣俾我, 幫我慳一舊水, 但係要過2日先有貨.

昨日到豐澤攞部E65, 好鬼死鍾意部機, 買完順便攞部Graphite去問「高價」手提電話收買佬, 佢話呢部機真係唔多人要, 有齊盒都只可以俾$1,600-1,700! 我只係用咗1個月就貶值了$2,000或54%! 部SX813我用了一年半都只係貶值$700或35%! 我點解當初會咁心急就去買部Graphite架!?? 有冇人有興趣出$2,500當可憐我同我要咗佢啊? 唔該吖!

令人費解

2007-02-28T09:07:00.000+08:00

自從屋企隔鄰個尚未正式開幕的商場開通了之後, 我們往返地鐵站都不用日曬雨淋了, 對我們來說確實是方便了不少. 不過最近聽到好多批評這個商場的聲音. 最多人批評現時商場光線不足, 設計肉酸又cheap, 地方不清潔, 自動電梯又經常唔開, 另外沒有大公司租商場舖位等等. 總之呢個商場就未能為大家帶來期望中應有嘅方便.

我覺得呢班人真係煩到爆缸, 自尋煩惱. 由始至終, 我們的屋苑都是沒有商場及街市的. 只有一個小小的超市. 當初大家買樓租樓時就應該將呢個事實計算在內, 預備好住在這裡, 要方便購物就要到附近的領匯屋邨商場及街市. 現在這個商場將會開業, 我們由甚麼都沒有到有這些基本設施, 理應覺得慶幸, 何解仲要有咁多投訴? 要記住這個商場不是獨立為我們而設的, 甚至理論上可能我們連批評的資格也沒有.

我們不是住在一個賣足一分鐘電視廣告的比華利山, 我們只是住在TKO, 隔鄰個商場的設計及租戶質素, 大家都不要有太高的期望吧. 無LV專門店咪出尖沙咀買囉. LV喺度開專門店, 你又會話佢cheap, 神又你鬼又你. 我自己都唔會期望我的鄰居有司機揸住架老闆車載佢出入, 每家每戶起碼兩個傭人啦. 大家唔好再發夢喇, 我哋唔係好高尚架咋, 醒吓啦.

又有一個投訴, 就係商場條自動電梯時常關閉, 人人時常要行樓梯, 所以李超人真係cheap. 李超人, 我識佢佢唔識我, 毫無交情, 但我確實覺得佢好勁, 身家咁豐厚都會親自管理自己個cheap商場內嘅自動電梯, 事事親力親為, 我咁懶怪不得我冇發達. 我提議我們發起一人一信行動, 老馮要我哋村長出馬到中環皇后大道中2號長江集團中心外絕食抗議及引火自焚, 強烈要求李超人親自道歉兼要李超人嘅公子出嚟開番條電梯, 無理由要尊貴嘅街坊行樓梯, 黐孖筋.

以前商場尚未開時, 從地鐵站回家有兩條路可選擇. 一是行上一條長樓梯上天橋過馬路回屋苑, 不過很少人會選擇行那條又長又高嘅樓梯. 選擇另外一個方法, 就是在地鐵站外過馬路, 行一條小斜路回屋苑. 如果商場條電梯沒有啟動, 只是一條樓梯, 情況就同以前得一條樓梯或一條斜路一樣, 得兩個選擇. 何解大家現在會選擇行樓梯呢? 我計算過, 行斜路所需嘅時間唔會多好多, 尚有甚麼理由要選擇行樓梯呢? 又要行又要鬧, 是否大家生活太緊張, 都變得心理不平衡了?

技術支援

2007-02-26T14:30:00.000+08:00

今早韓國嘅同事十萬火急咁打電話嚟報案, 話個system有問題, 要我們緊急處理.

我哋個department係要support公司整個Asia Pacific內使用呢個超低能嘅system嘅國家. 韓國都可算是其中一個最惡嘅user. 為了提供最佳嘅支援, 我們要求韓國同事盡快提供一些screenshots或一些error message讓我們找IT同事調查發生了甚麼問題. 收到個error message之後, 我哋個個都企咗喺度, 無從入手.

去年到韓國旅行時都知道, 韓國人的英語能力真的很低, 但我們真的想不到他們localize咗個interface之後, 連個error message都係出韓文. 其實我哋應該將這些error message交給印度嘅同事處理, 但我們有理由相信他們像我們一樣, 都唔會懂韓文. 睇嚟公司想centralize user support, 將工序migrate去一些成本低嘅國家都係白費心機. 現在個問題始於都未解決到, 但係韓國user都沒有再遇到這個問題, 睇嚟呢個問題又係會不了了之咯.

先生你要唔要D印花啊?

2007-02-05T16:27:00.000+08:00

「梗係要啦! 今期好嘢啊!」啊婆被我耍完之後笑笑口咁離開, 向其他目標進發. 有次Mrs Bullish仲寸, 扮聽個師奶唔到, 費事理佢.

時常在超級市場嘅收銀處俾人問我哋要唔要D印花. 好老實講, 我哋係唔儲印花嘅. 我連儲D印花嚟換乜都唔知. 我就係咁衰, 係都唔鍾意益人, 雖然呢D印花唔係什麼貴重嘢, 但係我唔想助長呢種問人攞印花嘅風氣. 就好似喺大陸唔好俾錢乞兒, 俾得一個, 就成條村D人會走出嚟問你攞.

我相信有好多人好緊張呢D超市印花, 有次有個細路樣衰衰咁問我攞, 其實佢樣衰唔緊要, 但係佢冇禮貌, 我當然更加唔會俾佢. 佢鹵味夠膽死當我殺父仇人咁怒啤我, 我將個印花貼喺心口係都唔俾佢. 吹咩!? 又有D人買嘢差十幾蚊就可以多一大個印花, 佢即刻叫個仔去買多少少嘢, 阻住晒後面條隊, 只係為咗個貼紙仔, 好鬼煩.

今日睇公司個人民網嘅Buy&Sell section, 嚇咗一跳. 公司D人可以cheap到將12個超市印花賣5毫子一個咁擺上網賣. 12個印花多謝港幣6元, 真係cheap到爆缸. 有點衝動用5毫子同呢位高人買個印花, 看看佢個盧山真面目. 我估公司提議開個Buy&Sell intranet嘅人發夢都諗唔到佢嘅偉大發明會變咗公司D師奶嘅散貨地. 唉, maintain個site嘅cost都唔只港幣6元啦, 哀哉.

Adam Air (KI574)

2007-01-17T11:08:00.000+08:00

1月1 日一架印尼內陸客機出咗事. 起初新聞都有報導, 過咗幾日都未搵到飛機殘骸, 又搵唔到乘客屍體, 現在新聞都已經冇再報導. 我在forum日日睇住其他網友post嘅新聞, 真係超級奇怪, 只係在1月11日搵到少少飛機殘骸, 到今日已經過咗16日, 都仲係一個人都搵唔到. 會唔會好似電影咁吸晒D人去唔知第n度空間呢? 當然大家都覺得機員及乘客凶多吉少, 但係如果可以好似Cast Away咁, 都仲有人生存, 遲D總可以讓人知道究竟發生咗咩事, 都算好過全部冇晒.

肥雞?

2007-01-17T09:26:00.000+08:00

前日公司終於推出肥雞餐. 感謝神, 喺災難來臨前掉了我去另一個部門, 不然我今餐實食無黐牙.

其實呢單肥雞餐料已經流傳咗好耐. 自從去年開始有消息話要炒法拉利, 又出warning, 又要佢幾多個月內有進步等等, 已經知道公司要cut人. 我哋當趣聞咁去聽法拉利嘅消息. 話炒又唔炒, 原來終於等到推出肥雞餐才邀請佢走, 公司真係益佢. 法拉利都真係好嘢, 一個返工喺座位日日釣魚釣到出晒名, 攞sick leave次數長居首位嘅茂利居然可以留喺度差不多6年, 真係離奇到爆. 如果有股東知道都唔知管理層駛唔駛集體辭職. 最記得去年我離開時要交低一些超低能嘅入數工作俾法拉利, 佢居然夠膽死問多咗workload係咪可以升職. 大佬, 你搵人同你影低你返工釣魚時個衰樣吖, 你咁嘅工作態度, 你真係expect公司養你一世啊? 可能我真係黑心到冇人有, 但係我真係好想睇吓佢離開之後會有乜嘢發展. 佢會唔會好認真咁諗吓自己條路會點行呢? 聽啊蛇講同佢照完肺佢都好似未get到自己要out, 真係唔知佢瞓醒未.

昨天放工遇到KC, 好自然就講起肥雞餐, 點知佢話我知佢有份要食. 我聽到真係尷尬到爆. 我都知佢際遇唔多好, 但記得佢之前已經可以升職, 估唔到佢又係肥雞餐嘅target. 再問才知原來佢仲未照肺, 亦無人同佢講過話佢要食, 只係佢自己覺得自己已經中招. 我真係唔知佢嘅表現, 只知道佢之前嘅際遇唔多好, 但係咪衰到要食肥雞, 真係要佢自己先知. 唉, 祝佢好運.

我鍾意/唔鍾意嘅嘢

2007-01-05T11:27:00.000+08:00

我打算記錄我每日遇到, 鍾意/唔鍾意嘅嘢

我鍾意:

朝早派AM730報紙嘅啊姐好好人, 好有禮貌. 佢換咗位置派報紙, 我去新位置找她, 她都認得我. 大家互叫早晨, 好有人情味. (5 Jan)

我唔鍾意:

搭地鐵到香港站, 落車嘅乘客在門中間只可以單行下車, 上車嘅乘客已經在左右趕著上車爭坐位. 最後佢哋上晒車, 我與兩位乘客都仲未落車. (4 Jan)
今個星期上堂, 西人老師第一日已與我們約法三章, 講明手機要set震機, 有電話可到班房外接聽. 今日只係第二日, 有些人已經忘記老師的說話. 手機鈴聲不斷, 還在班房內接聽電話. 老師又講, 佢哋又講. 大家成年人, 唔通要老師鬧咩. 老師當然沒出聲, 但已經表現得唔多高興. D人硬係要喺外人面前失禮先安樂嘅. (9 Jan)

新不如舊

2007-01-02T14:30:00.000+08:00

我聽了譚詠麟唱歌好多年, 他的廣東大碟我大部份都有買. 最近出版了一隻譚詠麟的精選碟, 其中有多首歌曲都係重新編曲及演唱. 這些新編新唱的歌, 都是我喜愛的歌. 大部份都是原曲當年出版時沒有做推介的滄海遺珠.

聽了這些新編新唱的歌兩次, 兩次聽後都覺得新不如舊. 幾首歌的編曲都彷彿大同小異, 而且實在太過普通, 與原來編曲的水準相差甚遠. 可能是先入為主的關係, 我覺得新的編曲與歌曲及歌詞本身格格不入, 令我有一點按[Skip] button的衝動.

可能現在香港的流行曲市場已經半死, 沒有老闆願意投入大量資金, 所以現在造唱片只能找些本地音樂人來造, 而有料的本地音樂人可能真係唔多. 再加上今日的譚詠麟已經不是當年與張國榮一起雄霸天下的歌星(真懷念那些好日子), 唱片公司有資金都不會像以往般找來多位有實力的日本一流音樂人來造音樂(第一個想起: 入江純). 他們的音樂真係又型又勁, 超級好聽.

譚詠麟自己本身, 都可能已經老了, 心態也不同了, 現在好像唱不出他最top時的功力. 他現在的歌, 好像消失了他當打時的型格, 所以要這隻精選碟內的第二隻CD開始播放, 當聽到譚詠麟真正的舊歌時, 我才醒神.

我嘅第一次

2006-12-29T09:29:00.000+08:00

居然喺香港俾我感覺到地震. 很久以前在加拿大居住時, 發生過輕微地震, 但當時我正在游泳, 在水中浮浮沉沉, 根本完全唔知道發生過地震. 早前香港附近發生過地震, 但我當時正在坐電車. 電車的震動比地震還要強, 我再次感覺唔到.

今年嘅Boxing Day, 晚飯後半躺在梳化上, 剛看完一節有線新聞, 大約八時廿五分突然感覺到梳化在上下震動. 我還以為係自己心跳唔正常, 劇烈跳動, 所以整個人都震動. 數十秒後, 我再感覺到梳化在上下震動. 再望望飯廳的吊燈, 全部都正在搖動, 我大嗌入房問Mrs Bullish, 係咪地震了.

九時正的新聞, 報導台灣發生了地震, 香港都感受到震動. 噢! 原來剛才真的是地震. 以前聽講過發生地震時要躲在門框下, 我們的餐桌是玻璃做的, 躲在餐桌死梗. 但原來地震真的發生時, 我係唔識反應. 只係識問人係咪地震, 係咪都死.

變態親戚

2006-12-18T23:35:00.000+08:00

昨晚與親戚晚膳, 席上一位長輩提起現在超市每月一次的無膠袋日. 不知怎的, 她對此安排十分不滿, 破口大罵, 還向我們述說她怎樣戰勝超市, 不知所謂.

話說在該無膠袋日, 她到超市買一支食油. 超市收銀員問她是否需要膠袋. 唔知佢黐咗邊條線, 反問收銀員「你話呢」. 我聽後已有點火. 她還問我說唔通要佢拿住支油行街咩. 我D火馬上升到二級: 聰明人啊, 你可以臨回家前才買嘛! 即使只是拿著一支食油在街上行也不見得有甚麼問題吧.

我記不起無膠袋日時一個膠袋要一元定五毛. 但對一位已退休又有得咬長糧的公務員來說, 肯定不會是一個問題吧. 何況那膠袋費是用來做善事的, 不會增加超市的收入.

親戚唔止唔肯俾膠袋錢, 她居然夠膽死同收銀員講同佢借個膠袋. 數日後, 收銀員認得她, 問她還膠袋, 她居然對收銀員說已幾日無幫襯超市, 即是已經用少咗超市幾個膠袋, 咁所以不用還啦. 她還得意洋洋地說收銀員都無聲出. 我D火馬上升到三級. 大佬啊, 我諗係個收銀員都無咁好氣, 費事同D咁無賴嘅人講落去.

唉, 親戚都係咁話. 真係唔可以相信呢個世界有人可以連個膠袋都呃. 我明白佢一定唔係為咗那一兩元, 可能係為咗那一啖氣, 但係為咗呢一啖氣, 就顯現到佢嘅修養. 幫理不幫親, 我真係一點都唔欣賞她這樣的行為. 我真慚愧, 我個親戚會做D咁嘅嘢.

Plane Spotting - 04 Dec 2006

2006-12-05T15:21:00.000+08:00

昨天又去plane spotting, 我真的很enjoy這個活動. 昨天我第一次見到甘泉航空從英國來港的航機. 不過我們見到的, 不是甘泉航空的第一架飛機, B-LFA, 而是B-LFB. 其實不再是國泰, 港龍, 東方航空, 南方航空或Air China已經非常滿足.

值得一提的是香港的空氣. 機場附近的空氣實在差到離晒大譜. 我們影的飛機照片就像《火舞黃沙》飛機版嘅劇照, 實在慘不忍睹.

當年今日

2006-12-05T14:45:00.000+08:00

今日係2006年12月5日. 喺11年前嘅今日, 我喺唔知情嘅情況下撬咗人牆腳, 經過數小時嘅深夜談判後, Mrs Bullish作出一個非常聰明嘅決定, 成為我的女友.

坦白講, 我經過多次觀察及深入研究, 都完全發現唔到佢當時有個男友. 情況就同美國佬死話伊拉克有大殺傷力武器, 但強攻入人哋領土再攪亂晒人哋國家之後又發現唔到有大殺傷力武器剛剛相反. 至少我無攪到雞犬不寧, 亦無人傷亡. 三個人其中有兩個人開心, 都算係好嘅結局吖. 恭喜, 恭喜.

奇人奇事

2006-11-29T18:15:00.000+08:00

今日同Clau姐icq, 佢講單奇聞俾我聽, 不過個主角都唔知係無知定扮嘢.

Clau姐... tell u sth funny
Clau姐... we have an IT guy here....
Clau姐... from missy's dept
Clau姐... and he has a perm seat
Clau姐... last month.....we found out that there is a bra strip (those plastic one) on his table
bullish... you told me b4 la
Clau姐... really?... but continue today
bullish... har? has part 2 ah? XDDD
Clau姐... it dropped on the floor.....
bullish... ok
Clau姐... and one of the guy picked it up...and pretended.....and asked who that belongs to
bullish... ...
Clau姐... and asked what's that............
bullish... XDDDD
Clau姐... when the guy said it belonged to him
Clau姐... do u know what he said
bullish... huh???
Clau姐... MOBILE PHONE string!!!!!!!!!!!!!!!!!!!!!
bullish... XDDDDDDDD
Clau姐... yiu..........
bullish... siu say ngor!!!!!
bullish... i like it!!!!
bullish... i want to have one too!!!
bullish... XDDDDDDDDDDDDDDD
Clau姐... chi gun
Clau姐... bin tai
bullish... but why was it on the floor??
bullish... broken??
Clau姐... no....
Clau姐... I think just accidentally fell on the floor
bullish... chi Q sin. but super funny~~~
Clau姐... yes....
bullish... does he know what it really is???
bullish... he is chi chi day
Clau姐... dunno...no one talked with that guy
bullish... hai~~~~ laugh die me
bullish... btw, is it a transparent one?
Clau姐... scare all girls la..... (most are girls here)
Clau姐... YES!
bullish... chi L sin
bullish... he bought it from woman street and think it is for mobile phones!!
Clau姐... XDDDDD
bullish... i really want to see see how he is using it
Clau姐... I saw it................
Clau姐... plastic one
bullish... XDDD
bullish... is he really so ignorance?
Clau姐... dunno.....
bullish... or he barn yeah ah?
Clau姐... but it's hanging over the partition
bullish... what??????
bullish... hanging over the partition??? :OOOO
bullish... XDDDDDDDDDDDDDDDDD
bullish... gul mang!!!!
Clau姐... yes!!!!!!!!!!!
bullish... who put it there?
bullish... the guy who picked it up?
Clau姐... dunno...........

我突然諗, 會唔會係個傻佬嘅戰利品呢? 我真係懷疑佢係咪真係咁純真.

跌市中的平安

2006-11-29T09:57:00.000+08:00

昨日放工回家途中, 收看3G新聞時才得知, 昨天港股的跌市, 是自911以來最大的單日跌市. 乜原來跌咁多. 今次跌市, 我期待已久, 個多星期前我已感覺持有的股票價格已升得有點令我唔舒服嘅感覺. 這樣說好像有點怪, 或許我應該說這些股票已經有非常大的升幅, 我因為輸唔起又貪生怕死, 所以先將股票沽出, 鎖定回報, 袋袋平安.

真的不知是我好彩或是我學精了, 見好就收. 所以昨天跌市時, 我完全沒有肉痛的感覺, 只希望佢跌多一點, 讓我遲一點可以再買貨. 記得以往的大跌市, 我往往都來不及沽貨, 又或者唔甘心要輸, 所以都成為大閘蟹, 晚上看財經新聞, 只有呆著, 心裡計算著自己賬面少了多少錢, 一日未沽, 我都仲未輸. 死蠢, 至少我已輸了機會成本.

或許我跟本就未夠班去學D阿伯阿婆炒股票, 學人玩即日鮮, 做day-trade. 原來我最賺錢的股票, 都已經至少持有三個月或以上. 沒有膽量又沒有彈藥的我, 還是乖乖的做些有實力股票嘅中長線投資吧.

今個冬天第一場雪

2006-11-28T19:51:00.000+08:00

爸媽及妹妹都分別告訴我, 他們那裡下雪了. 怎麼今年的雪來得那麼早. 妹妹還說所有學校停課, 但她還要上班. 當然啦, 我們已經不是小孩子了.

爸回港的航機足足遲了八小時才抵達, 我真的很想看看飛機在風雪中起飛的雄姿, 一定比平常的日子有型. 爸說, 計埋windchill, 當地只有零下18度, 我想零下18度與零下1度對我來說, 都是得個凍字, 分別不大.

媽今天send了一些雪景相給我看, 相是我昨天叫她影的. 我真的很懷念下雪的情景, 我喜歡在雪地上駕車的感覺. 我又記得很多年前超大雪我與爸媽在屋前的雪地上影相, 當年的雪真的很厚.

媽問我為什麼要睇下雪的相. 好簡單, 我真的很想「回家」. 我真的很喜歡當地, 我嚮往一個舒適的生活環境. 移居外地不是去旅行, 絕對不是一個簡單的決定, 很多東西都不是我可以控制, 希望來年我可以夢想成真.

我親眼見到A380了

2006-11-18T19:39:00.000+08:00

前幾星期已從forum得知A380會在今日中午12:30到港. Forum中的高手們可能要上班的關係, 他們選擇了星期日朝早去「送機」. 我由於明早要上班的關係, 我決定必定要今天去「接機」. 先睹為快!

昨天的天氣預報預測今日有雨, 心裡很不安, 我真係好想去「接機」, 不要戲弄我吧. 今日凌晨天還未光的時候, 窗外下著大雨, 雨點拍打落玻璃窗的聲音把我弄醒了, 我心裡都打定輸數.

今早九時起床, 馬上上網check吓機場的天氣, 仍然是能見度低兼有雨. 望出窗外, 天空白濛濛, 心裡15/16. 我真的不想, 亦不能錯過這個機會, 即使不能拍照, 我拿著雨傘都要親眼看看第一架到香港的A380! 十時正, 我出發往機場.

地鐵東涌線的列車, 到了欣澳站, 只得很少人下車, 香港隻米老鼠都唔知點生存. 但我更關心的是車箱內剩下來的乘客, 是不是都預備去接機嘅呢? 到達東涌, 才記起香港最近多了一個纜車玩意. 咦, 點解好似沒有人去接機嘅?

行到東涌地鐵站巴士總站, 正想找S52的巴士站時, 就見到有一部往飛機維修區的S52出現, 真幸運! 跑到去巴士站: 嘩!!! 咁多人嘅? 終於見到其他飛機迷喇!

巴士到達飛機維修區時, 已經到達的飛機迷會向我們揮手, 好有趣, 又好親切, 可能大家的心情都實在太興奮了.

離A380到達的時間尚有45分鐘, 我開始拍攝其他飛機. 我發覺由於天氣差的關係, 飛機要與我們很接近才可拍得清楚. 但由開始拍得清楚的位置起, 到飛機降落消失於我們的視線範圍, 我的相機只可以拍到兩至三張照片. 我怎可以只拍到三張A380的照片? 於是我便學習使用相機的連環快拍, 我用數架飛機做練習, 希望A380降落時我不會失手啦.

12:20分, 突然有個人從後大叫: 「仲有4分鐘!」原來是兩名警察長官. 「1224, 大家小心D啊, 唔好企咁出, 唔好跌落海出意外啊!」「Thank you sir!」, 大家愈來愈緊張.

兩分鐘後, 遠處開始又有燈光了.

「嚟喇, 嚟喇!」

「呢架744嚟架!」企在我們左邊的o靚仔說 (4你條命, 咪嘈啦)

(哈哈, 真係同從Airbus個website睇D相一模一樣o架)

全場靜默, 只聽到很多相機所出的聲音

實在太興奮了, 由聽到Airbus開始製造呢部雙層客機, 到睇Discovery Channel播放整個研製過程, 到A380第一次試飛, 再到今日我親眼在香港見到她, 我心裡真的很激動.

離開飛機維修區了, 我們一班飛機迷又迫爆了一部單層巴士. 雖然真的很擠迫, 但各乘客的面上, 都是帶著又興奮又滿足的笑容.

放假先嚟落雨

2006-11-17T11:06:00.000+08:00

明日週末, 難得不用返工, 我又有節目, 今早上網睇天文台預測居然表示明天多雲有一兩陣雨.

我宜家個心情, 就好像小學生明天去旅行, 希望有好天氣一樣! 唔好落雨啦!!!!

扁

2006-11-05T22:03:00.000+08:00

厚顏無恥! 小弟真係從未見過咁厚面皮嘅人. 祝台灣好運!

甘泉航空的客機

2006-11-01T21:47:00.000+08:00

很留意甘泉航空的新聞, 不是因為佢哋價錢低, 又或者首航失敗. 係因為我覺得佢隻客機使用率很高, 想留意下佢有問題時, 甘泉航空要怎樣處理. 我又覺得甘泉航空的機身顏色幾靚, 希望遲些可以擁有一隻甘泉航空的飛機模型.

甘泉航空的第一架747客機是從新加坡航空的附屬公司買回來的. 此飛機從1989年7月已開始服役, 90年代中期租借了給中華航空. 中華航空租借此機是因為要頂替他們1993年在香港啟德機場降落時衝了落海的另一部747客機. 2004年, 此客機租借了給西班牙的Iberia航空, 成為Iberia的首架747客機.

此客機好像有種特別的使命, 2006年9月, 她正式加盟甘泉航空, 成為此航空公司的首架客機, 亦是到今天為止, 甘泉航空唯一的客機. 希望在我下一次的plane spotting活動中, 有機會可以與她碰碰面.

Thank you

2006-10-15T18:49:00.000+08:00

我的工作, 時常要與在印度的同事接觸. 其中一位同事叫PB, 我與他通過很多次電話, 覺得呢位印裔同事講說話好斯文. 他工作又很落力, 時常諗辦法替我解決問題. 我很欣賞他.

前日, PB又替我辦好一件事情. 其實最近他已替我辦理好幾件事情, 我專程send封email給他一人, 加個哈哈笑"Thank you"公仔在email內, 衷心的多謝佢幫助.

或許是我們的部門已前給他們太多壓力, 每次有大問題, 我們的大老闆就將責任推落他們身上, 令人覺得他們做嘢唔掂. 老實說, 我真替他們不值. 但小職員如我, 能力所限, 愛莫能助.

一個普通的哈哈笑公仔, 原來在印度同事眼中, 是多麼的緊要. PB將我的Thank you email, circulate給他的同事. 他的team leader, SK, 看到, 居然send個email給我們說: "First smiling face instead of fire from ABC dept for over a year, thanks XXX". 看得出, 他們是多麼的高興. 我其實有點驚訝他們的反應會是那麼的大. 大家工作伙伴, 維持一個良好的合作關係, 永遠都會係百利而無一害吧.

我的manager看到SK的email, 向我們眾人說, 在印度的同事其實很勤力工作, 他們很高興收到我們的讚揚, 或者我們應該多些多謝他們替我們工作. 我聽到後, 覺得他真的不知所謂. 我真係唔需要你教! 多謝人是應有的禮貌, 並不是上司對下屬的獎賞. 鬼叫你時常責備印度同事! 我的manager算是一個能幹的上司, 我本來都幾欣賞他, 但他的基本禮貌, 我就真的不敢恭維了.

復工

2006-10-09T09:48:00.000+08:00

我哋返嚟喇. 放咗兩個禮拜假, 真係好唔想返工.

非常感謝我嘅同事當我放假時幫我做替工. 我宜家開始pick up番D嘢啦.

工作壓力

2006-09-14T16:46:00.000+08:00

我在社會工作了X年, 最近黐咗線, 居然感受到工作壓力.

工作排山倒海, 同一個project內的requirements, 好像永遠都做唔完. 離開死線已經越來越遠, (冇錯, 係越來越遠, 因為已經過了死線3日) 我只有愈來愈焦慮. 澳洲同事的要求天天新款, 印度同事的工作進度就越來越慢. 咁樣嘅情況, 正式嘅日子點交貨啊?

向我的上司匯報工作進度, 向他講出遇到嘅問題, 他只採取一個十分laid-back嘅態度, 向我表示做到幾多就交幾多給user試. 乜做嘢係咁嘅咩? 如果我哋係製造汽車嘅, 我只做好四個車轆同車身, 冇油門又冇軚盤嘅, 你叫人點測試啊?

呢個係這個部門嘅工作方式, 定係我自己太戇居太緊張啊? 我今朝又再睡到六點幾自動醒, 在睡床上諗我仲欠甚麼未做好喇, 我真係好擔心我哋會做漏嘢啊.

入廠

2006-09-04T09:27:00.000+08:00

前日去了醫院, 到手術室外等候做手術的親人. 在短短的等候時間, 有數位病人被推入手術室預備做手術. 做手術的病人有老人家又有青年人, 無論他們是做大手術或是小手術, 我站在一旁觀看, 都覺得被推入手術室的感覺非常可怕.

以往都聽人講過, 人老咗就會多毛病, 我都預咗遲早自己有一日都要做手術. 以前駕車去車廠做maintainence, 車廠替汽車換零件, 我都曾經同自己講, 人做手術就像汽車入廠換零件一樣, 是一些routine嘅事情, 換完零件試完車就走得. 希望咁樣諗可以減低自己對呢樣嘢嘅憂慮, 仲以為自己已經克服那種恐懼. 點知前日站在手術室外, 看著新車舊車入廠, 心裡很不安. 原來呢個心理恐懼, 不是想像中咁易克服.

我想我可以做的, 便是去看心理醫生. 但我無理由同醫生講我害怕將來要做手術, 請你幫我做心理準備. 比較實在的, 便是好好保養自己身體, 讓自己入廠維修換零件的機會減少吧.

生痱滋

2006-08-24T15:43:00.000+08:00

我經常生痱滋, 每一次都痛到無晒心機.

以前生一粒細嘅在嘴內嘅上方, 由於地心吸力嘅關係, 吃東西時很少機會觸碰到它, 都可算冇所謂. 唔知點解, 之後我D痱滋開始玩嘢, 成日生在嘴內嘅下方, 仲生正喺中間, 吃東西時避無可避, 十分痛苦. 痱滋其後越來越惡, 仲興起打孖嚟. 起初係兩粒細嘅生得非常接近, 幾日後, 兩粒細痱滋長大便合併成一粒大嘅超級痱滋. 吃東西時真係痛不欲生.

近日, 我的痱滋又攪攪新意思. 它們兩粒死人痱滋選擇在牙齒與牙肉的接合位生長. 連續兩隻牙, 一隻牙下面一粒. 我今次真係投晒降. 由於太接近牙齒的關係, 感覺就有如長時間牙痛, 非常困擾. 就算不吃不喝, 也一樣咁痛. 真係命苦.

PK?

2006-08-23T20:04:00.000+08:00

今日中石油公佈業績, 放工時用3G電話睇吓有乜消息. 睇到以下新聞, 我在地鐵車廂內傻笑了廿秒.

《國企紅籌》中石油料收購ＰＫ公司令每股盈利提升２﹒４％

2006/08/23 17:42

　　《經濟通專訊》中石油（０８５７）財務總監王國樑於業績發布會上表示，預計集團收購哈薩克斯坦（ＰＫ公司）６７％股權，將可令集團每股盈利提升２﹒４％，並令未來五年集團每年產量增長５％。
　　他解釋，由於根據收購協議，ＰＫ公司的股東均對該公司重大經營決策有否決權，包括就公司預算、投資及關連公司均有否決權。故此，根據國際會計準則，若公司任何股東對決策均有否決權的話，代表大股東未能完全控制該公司，故此不能將ＰＫ合併予中石油的財務報表。
　　而根據收購協議，若交易完成後，ＰＫ公司將分別由中石油與母公司合資成立的中油勘探與哈薩克斯坦國家石油公司各持有６７％及３３％股權。
　　王氏續稱，雖然未能將ＰＫ公司合併予集團的財務報表，惟相信對盈利能力無大影響。

人哋收購一間PK公司都可令每股盈利提升２﹒４％, 點解我公司咁多PK員工/PK同事, 我份人工唔可以提升２４％嘅?

雞鴨鵝講

2006-08-22T17:52:00.000+08:00

我的工作需要我與不同國家的同事溝通. 現在手頭上的project, 是個澳洲project. 上個月已經與澳洲同事討論好佢哋嘅requirement. 我哋review咗個requirement後交給落手落腳做嘅印度同事. 不知為何, 今次D印度同事好像總是不明白個requirement. 我已前前後後與他們寫email和傾電話數次, 他們都不明白. 我與印度同事桑木根和剎哲的工作關係一向都不錯, 但我今次都有點扯火了. 有時都聽到人話阿差蠢, 但我一定唔可以咁話桑木根和剎哲. 那樣實在太過不尊重他們的種族了.

桑木根提議與澳洲同事teleconference. 就這樣, 我們三個在地球不同地方嘅人就在香港時間下午三時舉行電話會議. 今次桑木根帶了他的新下屬艾軒錫, 阿滅與邊拿基出席. 澳洲同事基斯的女老闆莎敏也來了. 我與澳洲同事基斯重新向桑木根等同事講解一番, 講了大半小時, 桑木根等同事都仲問埋D九唔撘八嘅問題. 我察覺到基斯已有點不耐煩了. 再過多15分鐘, 莎敏扯火了. 她說如果做唔到, 整個project都唔出街了. 喂喂喂, 你係咪咁啊? 反而係個女人首先發爛. 跟著桑木根與他的下屬也起哄起來. 此時他們說著一些我們無辦法明白嘅英語, 香港與澳洲也靜了. 我身為中間人, 只好出聲擺平. 會議終止, 我要分別安撫雙方.

會議後桑木根send了一個flow chart給我, 向我表達他們所了解的東西. 我終於都發現問題在那裡了. 原來大家雞鴨鵝講, 根本大家都係講緊同一樣嘢, 不過表達方式唔同, 用字又唔同, 所以三個傻佬講極都唔明. 最終都係要用最簡單嘅語言: 畫公字來表達. 激鬼死! 根本就唔應該有問題發生. 但真的很高興, 事情終於可解決了. 都話唔可以話阿差蠢架啦.

咁都唔掛八號風球

2006-08-04T11:09:00.000+08:00

昨天真係好大風. 由朝早九點幾澳門改掛八號風球開始, 我就抱住一個希望, 希望香港都改掛八號風球.

冇錯, 我係懶! 我係想放假. 但我心裡真正的原因, 係我好想返屋企睇吓我間屋有冇事. 唔知甚麼地理環境因素, 我所住嘅屋苑特別當風. 之前一晚初掛三號風球已經感受到風那股震撼力. 整晚被風聲嘈醒數次. 風最強力的時候, 我與太太都給弄醒了. 但我倆都沒作聲, 可能因為我倆驚到唔敢出聲. 驚嘅係驚間屋嘅玻璃窗會被吹爛. 爆玻璃就麻煩喇. 所以早上在公司見到咁大風, 真的非常擔心. 即使有購買家居保險, 都不想自己間屋有事吧. 所以, 我係懶得有道理的.

Annual Progress Report

2006-08-01T18:17:00.000+08:00

我助養的小朋友, 5歲, 好瘦. 居然只得26磅. 我有點懷疑係咪寫錯. 我想我家的狗也比她還要重磅. 幸好她身體狀況良好, 希望在明年的報告中她的體重會顯著上升.

第二位小朋友, 9歲半, 4呎2吋都只係得60磅唔夠. 我估塞拉利昂的義工冇寫錯, 佢哋真係咁瘦. 我用香港standard再用自己同佢哋比, 當然會懷疑佢哋寫錯. 真係感恩自己由細到大都唔駛捱餓, 仲可以食到自己宜家咁樣. 不過我諗健康佢哋分分鐘好過我. 希望下次再收報告時, 可以佢哋重咗, 我輕咗啦.

冇眼睇

2006-07-28T14:10:00.000+08:00

昨晚放工撘地鐵, 去到中環排隊轉車. 在月台幕門前有兩個中國藉中年女子. 當列車到達, 車門正要打開之際, 兩個中年女子就企正門中間築起人牆, 好似打rugby般預備殺入車廂. 蠢人如我, 都知她們想第一時間衝入車廂搶個座位.

車門與幕門一開, 衝啊!!! 與車廂裡正要下車的數個乘客撞到正. 兩幫人角力, 行最前的下車啊叔破口大罵. 兩位中年女子懶理啊叔出口術, 奮力攻破敵方防線, 最後成功達陣, 爭到兩個座位, 還滿足地微笑, 真係辛苦晒.

其他乘客與我跟著行進車廂, 望望這兩件極品, 真係好無奈. 講咗萬七次嘅請先讓乘客落車, 宜家係咪冇咗喇? 其實呢種令人討厭嘅情況, 每一日喺每一個地鐵站都有發生. 但我還是不習慣, 仍然覺得好核突. 我時常覺得, 如果香港要所謂推廣旅遊業, 就要好好教育呢班濕柴. 俾D旅客見到我哋呢個所謂先進嘅城市, D人咁唔文明, 幾咁肉酸? 點解呢幾年香港人D品德越來越差? 退步得好緊要喎! 將來點算? 靠晒現在D細路? 佢哋都係由呢D厚顏無恥嘅大人教出嚟喎. 根本就係一個又一個嘅循環. Loop死咗. 我諗唔到辦法喇, 吊起嚟打又好, 罰錢又好, 再唔做D嘢, 只有死路一條. 我真係冇眼睇喇.

J小姐都結婚了

2006-07-27T14:12:00.000+08:00

昨晚與一班舊同事聚餐, 原來我已經一整年沒見過他們. 雖然咁耐冇見, 但我們沒有生疏, 很開心的過了一個晚上.

飯後大家歸家, J小姐與M小姐與我同路. 路上J小姐投訴說我婚後她從沒機會向我逗利是. 我當然說明年必定留封利是給她. 怎知她說原來今年已是她最後一次機會喇. 我天生反應遲鈍, 我來不及吸收她的說話, M小姐已經「咦咦」, 「咦咦」的叫了出來. 哈哈, 我明白了.

幾時好日子啊?
10月X日註冊, X+8日擺酒.
又係10月, 個個都喜歡10月結婚.
咁點解剛才食飯你唔公佈?
唔知點開口嘛!
怕羞啊? 哈哈? 恭喜晒~~

又有喜事, 真替朋友高興. 我哋8 個人, 我第3個結婚, J小姐第5個, 唔知下一個又會係邊個呢? 昨晚M小姐去到地鐵月台有男友等候. 咦! 仲係豹仔, 冇換畫喎. 我估佢第6都冇乜走雞喇啩.

A小姐結婚了

2006-07-25T22:17:00.000+08:00

A小姐通知我, 佢要結婚了. 婚期仲要係我嘅結婚紀念日後一天. 我真的無預到佢會咁快結婚. 我心目中嘅A小姐, 係個好鍾意玩同只係識狂笑嘅女仔. 睇咗佢D結婚相, 忍唔住笑, 真係估唔到佢會「收心養性」, 去做人太太. 又或者, 我睇人真係唔係好叻.

我同A小姐前後喺兩間公司做過同事. 第一次做同事, 佢發神經, 公司叫我哋去德福買嘢俾人上堂食, 佢買完唔肯返公司, 要行陣街先肯返. 攪到公司質疑我哋去咗邊. 幸好我們地位「特殊」, 有免死金牌, 如果唔係俾佢累死!

第二次同佢做同事, 都係佢介紹我用第一代嘅公司ICQ. 替我消磨不少時間, 不然我一定發霉. 最好笑, 就係佢話我知公司有個男同事追佢. 起初約會, 個男仔同佢去又一城, 晚飯時間居然提議去City個飯堂餐廳食, 浪漫到極. 我真係笑到碌晒地, 我諗A小姐當時都俾佢吹到「啤」一聲. 唔係話要去大酒店扒房, 不過大家都已經出來社會做事, 不用仲咁學生feel吧. 到今時今日, 我還記得呢單嘢, 希望A小姐唔好嬲.

回想起, 呢D嘢都唔知係幾鬼多年前嘅事, 我又老了, 真討厭. 祝A小姐與P先生結婚籌備與安排順順利利, 兩個開開心心, 白頭到老, 永結同心啦. 恭喜, 恭喜.

網誌聲明

2006-07-18T22:39:00.000+08:00

上星期, 本人收到一位陌生人在本網誌留言. 該位人士可能從某forum得知本人買了「請聽我的誓言」CD, 在留言中表示「婚紗故事」一曲很好聽, 希望本人能將mp3轉寄往一個澳門電郵地址.

呢位Macau friend, 非常抱歉, 本人不能將歌曲轉成mp3給你, 因為

我們不相識
道義上, 這樣做不太好
我不知這樣做是否犯法
我不清楚你是否海關人員, 上嚟呢度跣我一鑊
我更不知你是否版權持有人, 上嚟呢度跣多我一鑊
我唔得閒將隻歌轉做mp3
我可能唔識將隻歌轉做mp3
維X世伯都買咗一隻
你都自己買一隻, 算吧啦

牛佐翰 - 每日一字

2006-07-13T14:02:00.000+08:00

今日同大家討論吓個「嘢」字.

「嘢」, 一嘢兩嘢咁解. 舉例:- 大雄向老師投訴: 「靜宜佢打咗我一嘢」. 即係有個弱者俾個女仔打咗一嘢, 好清楚, 不用詳細解釋. 「嘢」又可以代表東西; 隨你喜歡點用都得.

不過, 最近成日聽到有人用以下嘅方式用個「嘢」字, 覺得好似有問題, 想同大家分析討論. 有冇聽過人講: 「...D嘢食好好味...」? 問題就係「D嘢食」呢三個字. 我雖然語言能力唔係高, 但係我相信「D嘢食」冇乜可能係一個詞. 如果「D嘢」係個形容詞. 咁「食」就應該係動詞. 句說話就應該咁講: 「D嘢好好食, 好好味」. 「D嘢」可以係垃圾, 又可以係狗屎. 不過如果「食」係名詞, 又唔想令人誤會, 就應該用「食物」. 如果想形容D食物好味, 只需講「...D食物好好味...」, 唔好係唔係都加個「嘢」字.

個「嘢」字唔好亂用. 如果你話「買嘢食」, 「買嘢飲」, 咁又講得通. 「嘢」字跟住個動詞嚟用, 就比較穩陣. 可能D人聽得多講得多, 就混淆咗. 佢哋係應該「買嘢」食, 而唔係買「嘢食」. 但係如果你硬係要講「跑嘢」, 「跳嘢」, 「踎嘢」, 咁我都無話可說.

其實個「嘢」字係個好深奧嘅字, 我都唔清楚「死嘢」或「衰嘢」係名詞定形容詞. 例如, 主人鬧隻狗:「你個死嘢, 又隨街大便」. 最多人講嘅「攪嘢」, 又係乜嘢詞呢? 有機會再同大家討論.

旅行難忘事

2006-06-27T13:23:00.000+08:00

今次去旅行有幾件奇事令我印象深刻, 其一就係坐飛機. 並不是因為坐我隔鄰的討厭師奶, 而係我咁大個仔, 坐咗幾十次飛機, 第一次架飛機在空中突然急墮. 雖然機師在飛機急墮前一分鐘已亮起安全帶燈號, 但完全沒有廣播. 突然, 飛機遇上不穩定氣流, 但飛機的搖晃與一般嘅搖晃不同, 有點失控嘅感覺. 隔兩秒後, 飛機突然急墮. 我們的感覺就像坐過山車向下衝一樣, 很多乘客都大聲尖叫出來. 仲有乘客因此而將飲品倒瀉, 條褲個大脾位濕晒, 很狼狽. 飛機回復穩定後, 我想起在The Flying Book書中解釋過飛機急墮的原因, 其實情況就像坐船遇著大浪一樣. 其實飛機仍然很安全, 只不過我們在飛機內看不到飛機前方, 即使我們能看到, 氣流都不像海浪般可以看得見, 所以突然的改變會令機上的乘客覺得不適和不安. 話雖如此, 但我都不想再遇上急墮了.

第二件事就係有一朝我們起床後, 發現酒店房內所有的電燈與電器都開唔著. 幸好冷氣沒受影響, 不然半夜熱醒或焗醒, 要找人來修理都幾煩. 我打去Housekeeping叫人來修理. 佢哋個engineer要15分鐘才可到來, 我估係fuse跳掣啦, 佢好快就攪掂, 不過在有名嘅酒店房間發生就好似有點出奇.

可能曼谷太熱了, 電力負荷大重, 最尾一件事又係關於電. 話說我們在Central百貨公司行街. 太太正在睇一些我全無興趣睇嘅貨品, 我唯有在更衣室外的梳化坐下休息. 突然, 所有燈光熄滅. 全百貨公司漆黑一片, 真的伸手不見五指. 百貨公司的後備電源馬上啟動, 但不是所有燈光都回復, 自動電梯都停晒. 很多人都馬上往下走, 往出口離開. 而我們亦在這個突發嘅情況下完成我們當天的活動, 返酒店休息. 無聊. 嘻嘻~

我哋好唔得!

2006-06-26T09:55:00.000+08:00

我去旅行嘅地方唔算多, 除了關島的人太注重日本人, 對香港人冷淡一點外, 我都喜愛世界其他地方嘅人. 享受同唔同地方嘅人接觸.

唔係第一次去曼谷, 但仍然係咁鍾意, 仍然係咁enjoy. 曼谷係一個香港人旅遊熱門地, 我們乘坐的客機, 差不多九成滿. 由於人多的關係, 而我們又買團體票, 我與太太要隔著走廊而坐. 坐在我隔鄰的, 是兩個樣貌同打扮都typical到不得了的香港師奶. 呢兩位師奶一上機就不停高聲談話, 不到10分鐘我已經覺得不妥, 因她們沒跡象會停下來. 其實她們自己談話沒有問題, 亦唔關我事. 但她們太大聲騷擾到我, 騷擾到其他乘客就關大家嘅事. 坐在我們前一行的「飛機啊叔」, 只是由飛機離開閘口到跑道的時間內, 已兩次回頭望一望, 表示她們太煩, 太大聲. 哈, 佢兩個真係理得佢死. 繼續你有你望, 佢有佢講. 我又察覺到, 在飛機起飛時空姐坐在我們前面, 亦皺一皺眉頭, 看看是誰那麼嘈吵.

我偷聽兩位師奶的談話內容; 啊, 原來兩位師奶都算已經走遍世界各地, 去非洲她們suggest由加拿大經Amsterdam才到非洲, 厲害. 美洲, 歐洲, 內蒙, 西藏, 其他冷門到爆嘅地方她們都到過. 我相信她們必定見識廣博. 但空姐派發泰國入境表格, 她們好像不懂怎樣填寫, 入境與transit都分不清. 我真懷疑她們之前是不是只是在吹牛. 其實如果她們真的有那麼多的出門經驗, 她們理應留意到冇乜邊個地方嘅人會好似佢哋咁乞人憎, 講嘢咁死大聲, 嘈鬼住晒, 想瞓一瞓, 休息吓都唔得.

我頂唔順, 又唔想同D死八婆交手, 當空姐行經我坐位時, 我問她有沒有耳塞. 可能這個泰國空姐同我一樣, 覺得佢兩個超煩, 回應我時, 微微奸笑. 她快速地為我找來一對耳塞, 我亦大動作地拆開包裝袋, 塞住對耳, 睡覺.

去到曼谷, 在餐廳食晚飯. 全餐廳滿座, 侍應為幾個香港人找來近門口的餐枱, 一個女人露出不滿的衰樣, 指手畫腳, 破口大罵. 泰國侍應都黑面. 我想, 全因為這些自以為上等的極品香港人, 我們香港人不會太受歡迎.

在回港的航機人, 一上機, 又有一班香港嘅後生仔女, 在機上大聲講, 大聲笑, 當中還夾雜著粗口. 真不明白香港人在那裡, 即使不是自己地方, 都咁大鼻, 都咁大聲, 都咁自大, 都咁討厭. 我都係香港人, 但我真係越來越討厭呢個地方, 越來越討厭「自己人」.

放假喇

2006-06-21T17:30:00.000+08:00

ho ho ho~~~~ 食早餐, 游水曬太陽, 食晏, SPA & massage, 行街, 食飯; 回復一個正常人嘅生活, 我又放假喇~~~

手上有乜project趕住出街我話知你咯, 返嚟先算啦!~~~~ 拜拜!

Summer Signings

2006-06-19T22:20:00.000+08:00

世界盃的關係, 今年特別難買新球員. 目標球員在世界盃踢得好的話, 轉會費必定會高得離晒大譜, 我們不是Chelsea, 我們不是玩緊Fantasy Football, 所以之前嘅#1 Target: Fernando Torres我諗都凶多吉少.

Liverpool暫時只買了阿根廷後衛Gabriel Paletta同Mark Gonzales. Valencia左後衛Fabio Aurelio據悉會在1 July以自由身轉會. 我對他們全無認識, 只聽聞Gonzales上季在Real Sociedad踢得很出色. 但Reina同Sissoko加盟Liverpool之前, 我對他們也是全無認識, in Rafa I trust.

Liverpool右邊中場一直都缺乏人才. Forum內的Insider說Liverpool正同Sevilla相討Daniel Alves的轉會事宜. 據聞轉會費高達£10m以上, 而且Sevilla好像還是貪得無厭. 如果不成事, backup option將會是Birmingham City的Jermaine Pennant. 唉, no comment.

前鋒方面, Cisse又再重傷, 本來想將他賣給Marseille或Lyon的機會落空. 有說因此Liverpool冇錢買貴價球員. 今日Liverpool正式向Blackburn Rovers提出以£6m收購Craig Bellamy. 很多forum的朋友都不喜歡, 恐怕他場內場外的行為會對球隊有影響. 原來Bellamy本身是個Liverpool fan, 又願意減薪來加盟. 以一個26歲又有豐富Premiership經驗的國腳級球員來說, 我覺得£6m實在超值. 我有信心Rafa與Gerrard可以控制到這匹野馬.

我心底裡堅信Liverpool的summer signing不會就此結束. 我堅信還會買多一個big name stiker. 我希望將會是Dirk Kuyt或David Villa. 雖然在足球新聞很少聽到Liverpool的transfer news, 但當你肯俾錢加盟一些forum時, 你便可知道, 外表看似平靜, 但背後卻是很緊張同令人興奮的.

死o靚仔, 有得玩好玩喇~~

2006-06-14T14:47:00.000+08:00

6月14日, 下午2時44分. 我在辦公室內工作, 好眼瞓. 我聽到公司樓下幼稚園D細路在樓下花園玩耍, we嘩鬼叫, 好大聲. 我最討厭D細路放聲尖叫, 真係好想兜巴星佢哋. 但係, 我又偏偏很羨慕呢班we嘩鬼叫嘅細路.

我羨慕的, 不是他們有得玩. 要玩, 我哋攞幾日假, 想去玩就玩, 有幾難? 我只羨慕他們玩完唔駛回到現實世界, 唔駛回工作崗位. 玩, 食同瞓就係佢哋現時嘅工作. 我將來都可能會有玩, 食同瞓嘅時候. 不過恐怕要到我退休後才有機會. 到時我周身骨痛, 眼又朦耳又聾. 跑又跑唔郁, 想嗌都嗌唔出. 即是永無機會好似D細路咁, 玩得咁爽.

唉, 我小時候又唔識得珍惜. 不過, 如果我走落樓叫班細路好好珍惜, 玩得開心D, 佢哋都唔會明我講乜, 算把啦.

巴士啊叔

2006-06-03T23:13:00.000+08:00

巴咩士啊咩叔? 整件事根本就係一個發神經嘅混蛋, 喺巴士上臭罵一個驚到聲都唔敢出嘅男子. 佢其實都係完全廢噏, 賴有道理咁, 胡說八道. 一日起兩日止. 仲有乜好講?

點解D人可以咁雀躍? 可以講咁耐都未講完? 點解D傳媒可以每日咁去報導嗰個吹水唔抹嘴嘅混蛋? 點解佢哋唔可以報導多D賴昌星單案, 陳水扁收皮未, 又或者印尼地震? 我唔敢扮高尚, 但我真係對呢D嘢關心多D喎. 嗰條友去扒王之扒撈關我叉事麼? 討厭. 傳媒嘅報導方式, 令我諗起當年陳健康事件, 我真覺得香港的報紙雜誌好屎. 唔寫喇, 勞氣.

世界盃心水提供

2006-05-27T14:26:00.000+08:00

我對世界盃興趣冇對EPL咁大, 不過我都要跟住熱潮, 講吓世界盃.

David Webb每年聖誕都有心水股提供; Ladies & Gentlemen, 我的2006世界盃心水提供:

西班牙 (因為有Alonso, Luis Garcia, Reina, 仲有Liverpool target: Fernando Torres)
荷蘭 (Liverpool target: Dirk Kuyt)
阿根廷 (我覺得我鍾意)
法國 (Cisse, 仲想留意吓Franck Ribery; 除咗好波,唔記得邊個在Koptalk forum話佢係the ugliest football player of all time, 好衰, 但好好笑)

我唔鍾意巴西, 英格蘭有Neville, Lampard, Ferdinand, Ashley Cole, 仲有Joe Cole, 我通通都唔鍾意.

我唔賭錢嘅, 你死你嘅事, 輸咗唔好揾我.

制服零誘惑

2006-05-21T19:14:00.000+08:00

今日又一城有個「國泰翱翔六十載巡迴展」, 其中有個環節叫「飛躍雲裳」經典制服匯演. 由國泰員工演繹不同年代的制服. 國泰的員工制服對我沒有甚麼誘惑可言. 皆因我有同學仲做緊國泰空姐. 而且我媽退休前, 我差不多天天都見著國泰的員工制服穿在我媽身上. 我又不是戀母狂, 所以我不及商場內某些有心人興奮.

除了我媽, 我以前亦在舊相片中見過我的姨媽穿著更早時代的國泰員工制服. 今日在2006年見到這些制服, 覺得那時的設計師都幾玩嘢.

睇完今日的展覽, 我覺得有點奇怪, 我媽又不是空中服務員, 又不用面對客人, 不明白為什麼她當年要穿著制服. 另外, 我發覺我媽所穿的制服顏色, 在台上例必行在中間, 我想我媽當年都唔會太低級吧. 厲害!

制服匯演完畢, 參觀展覽其他項目, 突見閃光燈閃過不停, 以為有明星到場助興. 原來有數位唔知係國泰的員工定係model, 擺pose俾人影相. 只見很多攝影友係咁影, 我沒有攝影友的裝備, 但有女子肯乖乖站住任我影, 我當然冇執輸. 雖然她們不是美若天仙, 但她們必比香港小姐還要漂亮, 叫人看得賞心悅目. 如果係徐子珊或者葉翠翠, 我諗我返咗屋企了.

遇著好人

2006-05-20T11:49:00.000+08:00

今日好開心, CC帶我去認識department其他同事. 佢覺得我好慘, 做咗兩星期都冇機會落office識朋友, 所以帶我去見吓人. 佢並不是官方形式去介紹, 係好輕鬆咁介紹其他人嘅俾我識. 佢又介紹department內的活動攪手俾我識, 個個都好似好好人. 佢哋唔同嘅, 介紹完佢哋會同我傾一陣, 唔會話介紹完個名就坐返埋位係咁先. 我都越來越覺得CC好人, 非常照顧我呢D新人. 有個女同事唔知頭唔知路, 以為我好善良, 懶攪笑走嚟兇我. 睇嚟我個衰樣都仲呃到吓人. 嘻嘻.

唔知點解呢, 以前個department D人好死. 包括我在內, 個個都黑口黑面, 好似好冇生氣咁. 除了個別自己D friends, 就算係隔離team, 坐我後面個同事, 都可以唔識, 又或者見面都唔打招呼. 過了那麼多年便成為習慣. 有個叫啊勝嘅經理同我講過話返工就要帶住個面具, 做D自己未必喜歡嘅工作. 我唔認同佢嘅說話, 點解做人要做得咁戇居先? 其實我本身係唔想咁嘅. 我之前喺香港做嘅三份工, 同D同事關係都好好, 宜家有番呢種感覺. 我都再唔想返工好似要我去死咁, 希望可以開開心心. 所以我已經加入我哋department嘅活動小組, 希望可以投入D, 識多D人, 識多D朋友. 開心要做人, 唔開心又要做人, 我梗係要爭取俾自己開開心心咁去做人啦, 我真係冇啊勝咁笨啊.

堅料?

2006-05-12T23:07:00.000+08:00

轉咗新工之後好耐都冇上forum, 今日星期五心情好, 下午偷偷地上網. 見到屋苑個forum有條thread真係笑爆嘴. 我D新同事仲未知我係癡線嘅, 我唯有忍住唔笑. 但我真係忍得好辛苦.

條thread話, 收到堅料我哋屋苑被民建聯入侵. 其實個subject都冇乜好笑, 因為我識民建聯嘅人, 而我知道民建聯並不完全等如親共或其他負面嘢. 我所識嘅人反而對民建聯同大陸有D好唔民建聯嘅抱負, 直得尊敬同尊重.

不談政治, 講返條thread, 那位人兄話ChapXX, MasterXX, 肥X, OceanX, Shixx, Dnxx, Your frixx, Titanxx, Simxx等人物係民建聯嘅黨羽同打手. 真係笑很到我死!!!!! 最慘就係我都叫做識得呢班傻佬, 呢班黨羽同打手, 仲同佢哋食過飯. 諗起佢哋個樣, 同譚耀宗, 曾鈺成, 馬力等黨魁拼埋一齊, 真係笑到我哭街.

我突然間諗起如果愛婆係劉慧卿(得喇得喇!我知佢唔係民建聯嘅人啊), 豬豬係蔡素玉.... 救命!!!

我想唔要我個BB

2006-05-09T09:47:00.000+08:00

昨晚與啊Wil的恆基同事踢波. 原來他們是啊Wil公司建築部的同事. 雖然他們不是很年青, 又不是滿場飛, 但大家工作了一整天, 他們還有力氣在球場上跑來跑去, 真佩服. 我們踢小型足球, 每隊7人, 我觀察到無論他們點換人, 隊中都總有7個指揮官. 每個指揮官只懂叫隊友走位, 然後自己交個連亨利都追唔到嘅直線, 個波出界之後仲要鬧人, 好笑得很.

問問啊Wil, 原來他們不是落手落腳做嘅建築工人, 他們算是管工, 怪不得他們那麼有領導能力, 又有力氣去跑啦.

昨晚Jacky都有交個大斜線俾我. 我用盡氣力, 追住個波到右邊底線, 大佬啊, 玩吓啫, 下次唔好俾得咁急啦. 幸好, 我腳不算短, 我辛苦跑到落底線, 居然俾我撈到個波. 個波向底線慢溜, 我也開始急停. 哎吔, 我忘記了自己懷了60多個月身孕, 我急停的時候, 我肚內的骨肉與我不協調. 他只顧繼續向前衝. 我要用右腳出波, 但我也要用右腳防止我再向前傾, 不然我會跌倒, 一屍兩命. 我只得一隻右腳, 我必然要先保護自己同胎兒嘅安全. 所以我要先用右腳企穩, 然後換一換腳, 再嘗試用右腳出波. 可是, 我一連串嘅動作太慢, 個波好似慢鏡般溜出底線, 而我亦踢空氣. 一個字: 「醜」! 幸好我場內外嘅隊友都俾個「小」字我以作鼓勵.

豈有此理, 累我當眾出醜, 我內心開始討厭我的胎兒. 我打算將佢打掉. 其實一向我都唔想要個BB, 我當初都係在不知不覺嘅情況下有咗身孕. 但係懷胎60多個月嘅感覺, 相信無乜人能夠明白. 始終同胎兒都有少少感情. 我希望用安樂死嘅方法, 讓胎兒不用受苦, 安靜地離開, 而我一點也不會傷心. 希望整個過程不用再歷時60多個月吧!

好的開始

2006-05-07T10:07:00.000+08:00

我到了新部門工作已兩天了, 第一天真的有點不適應. 可能是對新工作崗位尚未清晰, 害我以為我要寫program, 以為我要睇server. 我明明離開了IT, 幹嗎要做的工作那麼似個programmer? 仔細看清楚manager 小林 forward給我的數十個memo後, 開始知道他們想要我做甚麼了. 我真的離開IT了, 所要做有關電腦的工作, 沒以前那麼technical了, 我相信我能應付. 無論如何, 這算是我第一個task啊, 我總不能令各人(包括自己)失望吧.

雖然只是工作了兩天, 但我己感覺到我的新同事幾好人. 雖然年齡上我們有點距離, 但大家相處都很融洽. 我留意到他們工作時, 很喜歡一起研究, 個個都好肯去學, 我希望我會被感染. 以前工作時個別同事的工作態度, 我真的不感恭維.

第一日工作時, 小林跟我談了大半天. 可能他比較後生, 他的management style我比較喜歡. 原來他是我大學校友. 他還請我食lunch, 這一餐已收買我了.

第二日工作, 只得我同SY在office. 原來她是公司好幾個project的開荒牛, 在公司已工作超過廿年了. 很喜歡聽她的歷史故事, 她大讚我們現在的department, 大讚我們現在的大manager PP. 她有那麼多經驗, 我諗我可以放心相信她吧. 她說PP好真, 好肯與下屬一起分析, 又肯接受下屬提出意見. SY說大家有問題都可以開心同PP講. 可能我真的開始有好日子過了.

給牛佬的一封信

2006-05-03T14:00:00.000+08:00

親愛的牛佬,

你好嗎? 其實係邊鬼個衰人幫你改個咁嘅名? Anyway, 今日我last day, 我已將手上的無聊工作交給同事, 現在我比較清閒.

讓我想一想, 我還有甚麼未做好呢? 我要清理所有雜物, 記得帶Lotus Notes個ID file. 仲要帶走Liverpool旗仔, 明天帶去新department, 表明立場, 讓新同事知道我幾識波, 幾有品味. 到來年Liverpool贏Premiership時, 讓現在每個只懂盲目追捧車路士的glory hunter慚愧.

昨天我friend嘅同事請我食lunch, 今日與其他冇乜來往嘅同事食, 真奇怪. 該個多小時, 真是個很好的學習機會, 讓我學習怎樣與我不大喜歡的人相處. 我要明白, 我不喜歡人的同時, 人也可以不喜歡我. 公平, 原沒半點偏心... 苦澀, 慢慢向著心裡滲..... :P 老實講, 出嚟嘅效果都不錯, 加上有喜力伴著我, 這個入世未深嘅後生仔都幾有義氣. 同枱大家都有傾有講. 很難説, 可能今日的我, 心態上已經轉變了. 以往我天馬行空在腦內創作的反枱, 黑面, 咒罵通通不存在. 相反, 我仲有丁點嘅高興. 牛佬, 你千萬不要給其他同事看到這信, 不然以後我冇晒朋友, 我必定找你算帳.

説到底, 我都幾怕這些所謂farewell lunch. 可能我在這裡不夠投入, 我覺得我不值得他們去farewell我. 要他們破費, 有點不好意思. 記得在以前的公司, 我唔知係咪病菌入腦傻咗, 離職時請了廿幾人去卡拉OK. 很開心, 與今次的感覺有點不同.

牛佬, 我不寫了. 我又到了每次寫信, 唔知點收筆嘅階段. 再寫下去, 我只會語無倫次. 再見.

bullish 敬上

滿足感

2006-04-24T10:48:00.000+08:00

家裡走廊的天花燈, 我們入伙後不足半年已出現問題. 有時著, 有時唔著. 著的時候又可能會閃吓閃吓. 最近這半年, 直程完全唔著. 其實我都不知道是那裡出了問題. 到底是燈胆還是燈座出了問題呢? 我都沒好氣, 索性不理會它.

昨天放假在家, 終於覺得自己好蠢. 用了錢買盞燈回家, 燈居然唔著. 錢豈不是浪費了? 起初倒不如用個普通燈泡算了!?

終於下決心, 要搬椅子到燈下, 企高拆開燈罩檢查一下. 我都不算矮, 但估不到屋內的樓底有那麼高. 我一手要用力頂著燈罩, 很怕跌爛它, 另外一隻手要鬆螺絲, 累得我雙手快要抽筋了. 太太勸我不要再檢查, 但我既然已拆了燈罩下來, 真不想放棄. 我到樓下管理處借來木梯. 有了木梯, 要檢查就容易得多了. 原來是燈胆與電座的接觸點接駁不妥, 所以之前會閃吓閃吓, 後來鬆了便完全不著. 可能之前裝燈師傅比較馬虎. 就是這麼簡單.

將燈罩再安裝上, 按下電掣, 看見會發光的電燈, 心裡有著很大的滿足感. 哈!

廢話一大堆

2006-04-23T11:30:00.000+08:00

當一個人輸波, 又輸埋面, 極度沮喪, 有以下表現, 就輸埋品喇.

Chelsea manager Jose Mourinho in the FA Cup semi-final post-match interview.

Mourinho said: 'Did the best team win today? I don't think so. In the last 30 minutes we deserved extra time.

'In the first half nobody was better. They had a good start to the second half but then we dominated the game. I cannot wish them luck in the final. Middlesbrough and West Ham will be there and I must respect them.' (你講緊邊場波啊, 靚仔?)

He said: 'In the Premiership they have no chance. Over 40 matches no chance. Maybe they will surprise me and they can do it.'

'But in 10 matches against us they have won twice. In the Premiership the distance between the teams is 45 points over two seasons. We beat them in a final, they beat us in two semi-finals. A psychological advantage? I don't think so.' (乜聯賽D分係accumulate兩年咁計o架? 我睇o左差不多廿年英國波都唔知原來好似信用咭積分咁有得累積!)

'In four matches in the Premiership we beat them four times.'

'I wish them luck for their qualification match in the Champions League.' (九唔答八. 不過梗係要你咁講啦, 我o地上次semi-final贏你再決賽贏埋AC Milan都係要打qualification啊, 好彩有你照住啊!!!)

Mourinho preferred to criticise Graham Poll for awarding a free-kick against John Terry for a high boot which led to Liverpool's first goal.

He said: 'I don't think it was a mistake. The biggest mistake of the first half was the decision for the free-kick for the goal. When the referee gives an important decision 70 metres from the ball that is wrong.

What a bitter, bitter little man.

阻鬼住晒

2006-04-23T02:21:00.000+08:00

Chelsea 1 - 2 Liverpool

NOW LET'S GO AND WIN THE CUP !!

好不容易才上網睇到場波, 當我enjoy到70分鐘, Liverpool領先2比1之際, EDO call我. Operator話靚女有D嘢攪緊. 佢砌好個job去replace ZDBANPCB, 想我幫佢check吓, 然後攞RACF submit佢預備個job. 大佬啊, $#^*&$%$#^ 你係咪玩嘢啊宜家?? 你係咪真係咁乞人憎啊? 我last一次攞電話, 仲要只係second call你都要搵我嚟攪啊? 你唔好咁扮嘢得唔得啊? 我隊波宜家贏緊Chelsea啊, Chelsea狂攻緊我o地啊!!!!! 你都砌好個job, 自己攞埋RACF submit佢都唔怕死啦!!!! 如果我出街落pub睇, 咁你點啊???? 你有冇人性o架? ...........................

激到我吖~~~ 豈有此理, 我唔dump你10分鐘都唔得. 場波最尾10分鐘緊張到爆我睇唔得好清楚啊. 我唔 egg 時 cow 叉 Y 你都唔得. 好在宜家我贏波啫! 你真係....... 妖~~~~~

工友

2006-04-19T21:03:00.000+08:00

再過多14天，我就會完成我在這部門長達2376天的工作．真的不可思議，我竟然在這裡渡過了這麼長的時間，亦顯出我是多麼的無能．

做了那麼多年人，必然會遇到一些喜歡與一些比較唔喜歡的人．雖說是必然，但很不幸地，我在工作上都遇到一兩位後者．

我想了很久很久都不知應該怎樣形容這些人，更何況這些人係靚女．我記得中學時，中國語文老師「雞王」教我的課文：《第一個半天的工作》．費事俾人話我拋書包，我只記得課文中描寫女職員為了保住職位，被迫賣俏調情以逢迎上司的強作笑顏的辛酸工作生活這部份．當時的我，一點都感受不到女職員的辛酸．我只對辦公室的工作充滿憧憬，有著無比的嚮往．學生時，有些同學會希望將來做醫生，想做工程師；我不管，我將來只想在辦工室工作．長大後我才發覺現實生活永遠同學生時代的幻想有非常大的出入．　

我心目中的《第一個半天的工作》，的而且確常在現實中發生．經過了二千多日，扣除所有假期，我想我大約都親眼見到靚女所參與的千多個《第一個半天的工作》．當我看到真實的畫面，名副其實的真人騷上演後，《第一個半天的工作》原來會是多麼的噁心．所有的希望都幻滅了，原來最辛酸的，是那強顏歡笑的無能上司．

唉，思緒極度混亂，靚女的其他罪行我都不知怎麼講，實在頂唔順, 不知所謂．其實我自己都不明白我為什麼會用一篇日記去記念這個大眾敵人．天下無不散之筵席，我不會感嘆現在夠鐘要散席，我只痛恨散席得太遲．

好攪嘢

2006-04-11T10:07:00.000+08:00

昨晚看電視新聞報導, 海洋公園的水母館開幕了. 訪問了一位小妹妹, 她説水母好睇, 好攪嘢. 水母攪乜嘢呢? 為什麼小妹妹會説水母好攪嘢? 我到現在都不清楚水母攪乜嘢, 記者亦沒有追訪.

不知從何時開始, 「好攪嘢」這個詞被廣泛使用. 可能我比較落伍, 又比較遲鈍, 我真的不知道這個詞應怎樣, 何時, 和在甚麼場合使用. 我連「好攪嘢」解作甚麼, 我也不知道. 所以我從沒有用過「好攪嘢」來形容任何東西.

我相信如果我問人, 十個有九個都不知道「好攪嘢」點解. 我真的非常討厭人説這個「好攪嘢」, 那個又「好攪嘢」. 根本都不清楚他們想表達乜春夏秋冬.

我好攪嘢唔知「好攪嘢」點解, 各位好攪嘢朋友如果知道「好攪嘢」點解, 煩請話我知「好攪嘢」是甚麼. 功德無量.

說話的藝術

2006-04-10T16:28:00.000+08:00

昨晚爸問我Liverpool有冇得贏, 他要趕著下注. 爸是我的偶像: 他的事業成功, 在他工作的行業裡, 他地位超然. 他又供給我們這個家庭那麼那麼多. 他叫我買股票時, 買那隻, 升那隻. 他永遠都會是我的英雄. 但真估不到今次英雄居然會問我一個那麼白痴的問題. 我大大聲回答說當然會贏啦! (仲駛問?) 爸說: 「你個衰仔, 宜家講嘢都大聲過人, 之前成隻死狗咁.」人逢喜事精神爽吖嘛! 原諒我吧. 英雄真係英雄, 十分清楚我的低能性格, 馬上向我訓話和教我講說話. 他不準我在現職向任何人講現職的壞話. 還教精我要多謝我的team manager照顧了我那麼久. 緊記「山水有相逢」. 我想這便是人生經驗, 我最愛聽這些道理, 免得我出錯後, 才要從痛苦中學習. 他吩咐的事, 我必定聽從.

今早team manager果然找我談談轉職一事. 我愚蠢地讓他從去年起知道我討厭我的工作. 他說恭喜我可以轉職, 今次對我來說可以是個解脫. 我愕然. 彷彿我正在與醫生談論著我選擇安樂死的事宜. 我定一定神, 向他道謝他這麼多年的照顧. 這一趟輪到他愕然. 望著我, 他無言以對. 見他嘴唇輕微震動, 我不知他是否在唸粗口罵我, 但我又覺得他是找不到適當的字句回應我. 幸好當時有兩位同事到來找他, 讓他不用再死命找字句出來. 談話結束. 他很辛苦.

我的英雄, 確實有料到!

我家的狗狗

2006-04-10T13:57:00.000+08:00

窄太的Happy非常突然的離去了, 窄太家裡上上下下都很悲痛. 小狗很得寵, 雖然只是共處了3個月但大家都很愛錫牠.

心想, 我家的肥妹Perky都跟我們共處12年了. Perky年紀已不輕, 身體狀況很正常的比以前差. 雖然大家都有心理準備, 但我不敢想像她離去時大家會如何.

這位肥妹對我媽最忠心. 忘記從何時開始, 她已當我是個威脅. 老遠看見我, 她已要跑到我媽腳邊. 她真傻, 她就算躲在我媽旁, 我也可以對付她. 其實我都很愛錫她的, 只不過她不領情吧了.

我記得, 第一次在pet shop見到Perky時, 她骨瘦如柴. 其實她當時很肉酸的, 可能我妹妹心急想養狗, 所以便唔理好醜, 見係Cocker就把她帶回家. 小時候瘦骨仙都幾活躍, 會發狂追波, 又會追著我媽來咬. 可能她長大後知道自己是個女仔, 應該斯文點, 所以變得比較文靜.

有兩件關於Perky的事, 我最印象深刻. 當時尚住在舊居, 我坐在地毯上看她玩耍. 她那次圍著我又跑又跳, 跑了兩個圈, 她突然跳入我懷中, 在我的膝上睡著. 小狗真的可愛極了, 真不捨得推開她.

另一次, 當時internet尚未普及, 我要出外買報紙看體育消息, 我媽叫我帶Perky一起出去走走. Perky當時還很小, 行不到很遠已在喊, 我唯有抱著她走到7-eleven. 到7-eleven我把小狗放在地上, 拿一份報紙到收銀處. 印裔店員要我把小狗放在店外, 才賣報紙給我. 我說我付款馬上離開不肯嗎? 店員不肯, 硬要我把小狗放在店外, 才會賣報紙給我. 我說小狗年紀太小, 我不能離開她, 她也不可以自己一個在街上. 報紙, 我不要了. 我點衰都不會丟下她自己一個.

現在又有點掛念肥妹, 真的想飛到加國見見她. 又想試試她會不會一見我就走. 時間只會越來越少, 我想我要好好安排假期, 去看看我這個肥肥的外甥女.

開心變成擔心

2006-04-09T10:54:00.000+08:00

親人, 同事, 教會的弟兄姊妹, Forum的兄弟姊妹..... 各人都恭喜我. 彷彿我中了六合彩頭獎五千萬, 以後唔駛撈. 我信主後已再沒有賭錢, 再沒有買六合彩, 我是永遠都不會中六合彩的了.

昨天放工碰見譚老倫. 她說我可爽啦, 現在行步路都輕鬆D. 傻啦, 我早前運動後一對大腿賣老抽, 現在行路時仍有點酸痛.

其實好消息已被我消化得八八九九了. 不過偶然想起, 我還是會"kidd"一聲笑出來. 實在太討厭現在的工作. 現在的工作, 我幾年前已看不見有自己的將來. 幸好我還有少少的ambition, 不然我像法拉利般日日瞓, 得閒又攞吓sick leave, 冇貨交又冇人郁佢, 都不知幾快活. 他都瞓了很多年了, 這間控股公司這幾年的純利, 本應可每年多添十多廿萬的. 真替各大小股東不值.

很多人都恭喜我可以離開「地獄」, 其實我還有擔心的. 我不是擔心現在的工作由誰來接手. 我會擔心我只是由一個「地獄」, 到另一個「地獄」. 曾聽過離開了的舊同事說這裡其實是個溫室. 但在溫室裡的花, 偏愛出去看看外面的世界. 我也擔心我已懶散了多年, 恐怕我的turbo撻唔著. 手上有些工作堆積了多時, 今次是個好機會, 用餘下的時間, 開開turbo, 試試趕快完成這些煩厭的工作, 證明給自己睇, 我這個擔心是多餘的.

我的表弟

2006-04-08T09:34:00.000+08:00

表弟只比我小8個月, 年紀那麼接近, 眾人就覺得我倆理所當然會很「老友」. 事實上, 如田北辰所說: 「我倆不是老友」.

不是老友並不等如我不喜歡他. 我對他的感覺是"neutral". 縱使我倆年紀接近, 又讀同一間小學和中學, 但我倆都沒有時常走在一起. 因為我高他一個年級, 大家有自己的朋友. 我對他最好的, 就是每年留起我的考試卷, 讓他可以「預測」. 所以他當時的成績總比我好. 哈~

之後表弟去了英國讀書, 畢業後跟家人到了美國居住. 聽說他在美國的第一份工作不如意, 之後便沒有工作多年. 他的正職, 居然變成在ebay上做賣家. 又聽說他時常躲在房間對著電腦, 朋友也沒有半個. 無需要的話, 他可以兩星期不出家門. 舅父又買了架Benz跑車回來, 他也可以全無興趣, 連行去車房看一眼也不願. 他好像已變了一個「怪人」.

舅父舅母頂「怪人」不順, 硬要他回來香港找工作. 老實說, 他只有多年的投閒置散經驗, 年紀又不是很輕, 有誰會僱用他? 最令我惱怒的, 是舅父將他交給我, 因為我們「老友」. 要我成為他的救生圈. 我沒可能成為他的救生圈. 我有我的家庭, 我有我的生活, 我有我的忙碌. 表弟好像也明白, 回來後很少很少找我. 我有與他見面, 其實他沒有甚麼不妥, 表面上正常人一個, 總不明白為什麼他的際遇會是這樣. 我知道他有找工作, 但總不成功. 也許他空白的工作經驗, 成為了最大的障礙. 我爸的公司請人, 舅父硬要我媽叫我爸推薦表弟. 我爸不肯, 舅父好像不高興. 我爸對我苦笑說該職位是PR, 男女是沒有可能平等的. 公司要請女的PR, 根本沒可能幫他.

找了大半年工作都不成功, 表弟因機票將要expire, 選擇回美國了. 在這裡, 沒有人可以幫他. 大家在背後笑說, 舅父舅母那麼富有, 表弟又是獨子, 根本不用工作. 舅父舅母的財產, 已夠他一世所需. 我都不知應否替他「高興」.

What A Difference A Day Makes

2006-04-07T13:06:00.000+08:00

我, 真係冇大將之風, 興奮到頭暈. 杞人憂天的兩星期終於結束了. 很久很久沒有試過這麼興奮.

再一次感受到自己從昨天的死裡復活. 感謝主, 不厭其煩的聽了我重複又重複的禱告. 祢的安排, 永遠都是那麼奇妙.

實在太高興了, 希望一切能快點落實吧.

累了

2006-04-06T11:40:00.000+08:00

近日, 不知怎麼說, 無論自己與身邊的親人及朋友, 都有點事情不順利. 我的性格本是樂天的, 但我都覺得有點累了.

自己的工作, 一向都不順利. 可能自己對『順利』一詞的解釋與別不同. 無論如何, 工作不順利, 所以想離開的感覺, 從沒這般強烈. 我可以做的, 都已經做了, 我還可以做甚麼呢?

朋友的工作, 比我想像中還要差. 別人眼中的牙擦仔, 原來在辦公室裡十分鵪鶉. 上司對他很挑剔. 他做甚麼上司都看不順眼. 我可以做的不多, 但我都已經做了, 我還可以做甚麼呢?

親人的工作, 新合約談不攏. 他不喜歡這個合作形式. 又可能他真的太貴了, 非一般公司能負擔得起. 他當然失望. 我想他對這個Project還是很熱衷的. 我可以做的實在太少, 但我都已經做了, 我還可以做甚麼呢?

各人身體的狀況, 確實令人擔心. 身體健康原來比甚麼都重要. 我不是醫生, 我不能夠醫治他們. 對他們關心與支持, 可能是我唯一可以做到的. 我可以做的實在微不足道, 但我都已經做了, 我還可以做甚麼呢?

凡勞苦擔重擔的人可以到我這裡來，我就使你們得安息. (馬太11:28 )

新衫

2006-04-01T11:51:00.000+08:00

下一季我們會有新sponsor了! 這是否因為adidas跟Reebok合併了, 或另一些商業併購, 我不管. 我只知Reebok製造的球衣好唔靚. 自從我們從adidas轉到Reebok後, 我一件球衣都沒有買過. 實在買唔落手啊!

八十/九十年代時期, 我們的adidas球衣幾靚啊! 亦是我一向喜歡adidas這個品牌的原因. 當人們那麼的嚮往, 那麼的推崇Nike時; 我只覺得Nike是一個超貴兼物非所值的品牌.

網上最新流傳了一個新design, 我很喜歡這個design. 很簡單, 亦很adidas. 越來越接近季尾了, 這個design會是真正的design也不出奇. 就算不是真正的, 都會比較接近吧. adidas那three stripes實在神奇. 我一見就自然會喜歡. 在球衣的肩膀位加上, 特別醒神.

個人經驗, 當你踢波時, 如果對手有套靚的球衣, 自己心理上都會先輸半球. 正所謂唔踢得都睇得! 下一季當隊長帶著隊員穿上這件球衣出場時, 必定對對手有些心理威脅! 真的非常期待著下一個球季的來臨啊.

中獎

2006-03-31T14:07:00.000+08:00

近期又興抽新股. 其實都唔知D新上市公司係做甚麼生意, 總之係新股IPO就抽. 早前隻九龍, 見財化水等新股, 我都抽唔中. 每次都齋蝕$50手續費俾銀行. 今次居然俾我抽中隻有色眼鏡.

其實抽中都唔係話好興奮. 因為有色眼鏡細隻, 昨晚暗盤都只係$2.375, 最高都係$2.40. 即是一手可賺大約$1400啦.

今早有色眼鏡正式上場; 剛巧我要去做物理治療, 要完成後, 10時半先可以check股價. What?? 居然做緊$2.95/$2.975!? 大件事! 我仲以為自己好醒, 去做物理治療之前落了一個$2.50沽盤! 弊傢伙, 做o左大傻仔添! 馬上跑回公司check吓自己個盤. 奇怪, 居然冇做到喎. 仲唔即刻改! 終於改到$2.90沽出. 今次真係喜出望外.

今次無端端中獎當然高興啦. 但係呢隻有色眼鏡咁樣升法, 真係過份. 我覺得是個提示: 呢D抽獎遊戲遲早要爆煲. 貪字得個貧. 下次再有新股抽, 都係唔好咁無知, 咁麻木地參與. 冇理由次次都會咁好運吖嘛.

嚇死

2006-03-29T14:58:00.000+08:00

今朝5點瞓瞓吓個背脊無端端好痛, 痛到醒. 無端端痛, 完全唔知原因. 痛到連舉手都有困難. 唔係我想偷懶, 但今日想唔請病假都唔得喇. 到早上10點, 痛到呼吸都有困難. 時常要透大氣. 但一透大氣, 就好痛, 並非次次都成功.

去看醫生, 醫生突然問我有冇試過「爆肺」. 我俾人頂就頂得多. 頂到爆就真係未試過. 佢咁講, 我真係驚到震.

有個舊同學, 曾經試過在地鐵突然呼吸困難, 連上自動電梯都好像剛跑完400米般氣喘. 原來佢就係個肺穿了, 好恐怖. 當時要馬上入醫院治理.

同學的舊事馬上在我腦海中retrieve出來. 死喇, 宜家要我入院做手術啊? 我好驚喎. 醫生要我馬上照X-ray. 點解咁趕? 原來仲有15分鐘佢就夠鐘去食飯. 唓!~~~

等照X-ray時, 我諗清楚D, 我應該唔係爆肺喎. 我都冇氣喘! 我仲記得舊同學個醫生話爆肺通常o係又高又瘦o既男子身上發生. 我又唔係痩~~~ 我覺得我係肌肉痛o既機會大D. 但係我唔係醫生, 唯有祈禱同照完X-ray睇吓醫生點講啦.

等醫生睇個X-ray底片時, 真係慘過當年會考放榜. 好耐冇試過咁緊張. 醫生話: 「冇o野喎, 睇唔出有問題喎. 可能係D筋肌問題. 開D肌肉痛o既藥俾你啦. D片再send去俾專科睇睇」. 真係嚇死冇命賠.

又繼續等消息

2006-03-29T13:47:00.000+08:00

上星期收到風, 表示將會有關於重要收購的消息公佈. 星期日, 最遲星期一公佈. 非常期待; 真的非常期待. 這麼多年都停滯不前, 去年的成功之後, 實在需要有重大的改變, 才可以繼續向前. 不然, 只會像上一次般原地踏步.

星期日, 沒有公佈. 星期一呢? 係有事公佈, 但並不是有關收購的消息. Dunk究竟點攪架?

收到的消息是可能有資金流入, 隨後會有一連串的收購. 而我猜想今次同Kenny有莫大的關係. 如果事成的話, 這個將會係一個非常好的消息. 這是對未來一個非常重要的事項, 暫時內容不能公開.

唯有記著所提及有關Kenny的事. 繼續等好消息吧.

討論區的爭辯

2006-03-25T11:12:00.000+08:00

近日其中一個我常去的forum, 某些人在爭辯一些事務.

我都覺得交換意見是好事; 但要令人屈服, 硬要人接受你的意見又是另一回事了. 我在forum中沒有敵人(別人當我係敵人另計), 當我見到這些寫到水蛇春咁長而grammer又蕩然無存的爭辯時, 我都真係頂唔順. 睇都費事睇了. 主席同窄太真係好心機, 齊齊加入辯論. 但要面對一個硬頸又固執的對手, 真係少D心機同耐性都唔得.

我相信好多人都同我一樣, 選擇旁觀. 生活太多事務要煩了, 無需要再為自己增添麻煩吧! 又或者, 大家和我一樣, 都唔知佢長篇大論根本講緊乜!?

懶惰

2006-03-25T10:28:00.000+08:00

一個星期七日, 我諗我拿起一枝筆來書寫的次數都沒有十次.

除了工作時寫下小小的筆記, 或每月開支票付款; 平日根本沒有用筆書寫的需要. 工作時大部分的時間都是用電腦. 同人溝通send message或send email時, 根本完全不用揸筆. 我寫字一向都唔靚, 現在寫字這個技術生疏了那麼多, 寫出來的字不論中文字或英文字, 就更加核突.

我助養的兩位塞拉利昂小朋友, 時不時都有寄信給我. 每次她們都希望我告訴她們我的生活環境, 我的家庭, 生活, 各式各樣. 我不想只做每個月交數百元的隱形助養者. 其實我心裡面真的有惦記她們, 我都很想回信給她們. 但我真的拿不起那枝筆去回信. 我曾想過用電腦打出來, 但電腦印出來的信, 始終沒有人手的筆跡那般有誠意.

以上全都是事實, 又是我的藉口. 其實我, 真係好懶.

等消息

2006-03-23T11:31:00.000+08:00

等. 唔知要等到幾時.

雖然今日只係第二日, 但我已經好唔耐煩同好緊張.

聽過希望越大, 失望越大N咁多次. 以往亦用呢兩句嚟安慰人或叫人唔好咁緊張N咁多次. 但偏偏唔可以叫自己唔好咁緊張. 昨晚已經連續第三晚瞓得唔好. 我諗, 我對呢件事的希望實在太大了.

我諗我急切需要好好調較自己o既思想. 如果「希望越大, 失望越大」真的發生, 我真係會好傷心.